Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 21 abríl 2021 (TATOLI)—Komisaun B ne’ebé trata asuntu Negósiu Estranjeiru, Defeza no Seguransa, lideradu Deputadu José Agostinho Siqueira ‘Somotxo’ propoin millaun $55 liuhosi alterasaun Orsamentu Jerál Estadu (OJE) 2021 hodi responde ba dezastre natural iha territóriu nasionál.

Notísia Relevante: PN aprova Orsamentu Retifikativu iha jeneralidade

Komisaun B nia proposta ne’e husu aumenta millaun $55 ba Sekretaria Estadu Protesaun Sivíl hodi responde problema cheias no inundasaun ne’ebé akontese iha loron 4 abríl.

“Proposta hosi Komisaun B nian mak husu aumenta osan millaun $55 ba protesaun sivíl hodi atende vítima dezastre naturál, ne’e bazea ba dadus levantamentu hosi protesaun sivíl, Ministériu Finansa mós hatene ona. Ha’u fiar katak Governu tomak fó atensaun ba ida-ne’e,” Prezidente Komisaun B ne’e informa ba jornalista sira, iha Parlamentu Nasionál, kuarta ne’e.

Prezidente Komisaun B ne’e hateten, proposta millaun $55 ne’e propoin ko’a osan kada ministériu liuhosi alterasaun OJE 2021. Tanba, orsamentu retifikativu ne’e la’ós aumenta maibé mobiliza fali ezekusaun orsamentu ba programa balun la hotu, entaun ohin loron halo ezersísiu oinsá foti osan ne’e.

Prezidente Komisaun B ne’e fó-sai katak, kalamidade klimátika ne’ebé akontese iha loron 4 abríl liubá ne’e, halo destruisaun uma, estrada, edifísiu públiku sira no infraestrutura sira seluk tanba ne’e presiza resposta ho urjénsia.

Iha dezastre naturál ne’e, lori família rihun 50 mak sai vítima ba inundasaun inklui inundasaun ne’ebé akontese antes ne’e.

“La’ós rezolve maibé atu atende lalais família sira-ne’ebé oras ne’e presiza hanesan kalen no buat hotu-hotu, ne’e mak ami propoin millaun $55 ne’e,” nia dehan.

Iha proposta-alterasaun ne’e proponente mai hosi deputadu sira hosi Komisaun B rasik hanesan Deputadu José Agostinho Siqueira ‘Somotxo’, David Dias Ximenes ‘Mandati no deputadu sira seluk.

Proposta ne’e hatama ona ba meza Prezidente Parlamentu Nasionál nian no sei pronúnsia proposta sira iha tuku 15.00 lokraik, iha diskusaun alterasaun ba Lei OJE 2021.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here