Osan Dollar Amerikanu. Imajen/Espesiál

DILI, 21 abríl 2021 (TATOLI)Hafoin Parlamentu Nasionál (PN) aprova Orsamentu Jerál Estadu (2021) tinan 2021 ho montante biliaun $1,895 no hetan promulgasaun hosi Prezidente Repúblika (PR) maka Governu hahú ezekuta normál tuir dekretu ezekusaun ba orsamentu.

Bazeia ba dadus ne’ebé Agência TATOLI asesu hosi Portál Transparénsia, iha kuarta (21/04), hatudu katak ezekusaun OJE 2021 atinje ona 23,8%.

Nune’e, gastu orijin hamutuk $1.895.000.000, komprimisu $130.613.142,75, obrigasaun $69.916.346,14, atuál $381.379.390,47, no saldo $1.313.091.120,64.

Enkuantu, reseita hosi orijn $187,309,810, komprimisu no obrigasaun $0, atuál $242.517.405,34 no saldo -$55.207.595,34, ho totál ezekusaun 129,5%.

Orsamentu 2021 ho montante biliaun $1,895, ne’ebé foti hosi reseita fundu petrolíferu biliaun $1,377 no reseita naun petrolíferu millaun $508.

Hosi totál reseita fundu petrolíferu biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.

Iha planu asaun anuál Governu ba tinan oin, reflete kontinuasaun traballu reforma jestaun finansa públika, ne’ebé inisia susesivu Governu liuhosi roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha Governu implementa orsamentu bazeia ba programa.

Bazeia livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade 1.837.

Kuadru planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS 2030), hanesan dokumentu estratéjiku no dokumentu polítiku.

Prioridade lima ba 2021 mak hanesan bem-estar sosiál, protesaun sosiál no sidadania ho despeza $645.180.926 (35,9%), investe iha ekonomia no finansa públika hamutuk $374.622.063 (20,8%), mellora konetividade nasionál $546.181.052 (30,4%), konsolida no fortalese defeza, seguransa no relasain externa $158.830.873 (8,8%), konsolida no fortalese justisa, demokrasia no direitu umanu $72.428.398 (4%).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here