Kondisaun Mota Comoro, durante inundasaun iha Dili, segunda (12/04/2021). Imajen TATOLI/António Gonçalves

DILI, 21 abril 2021 (TATOLI)—Administradór Postu Administrativu Dom Aleixo Munisípiu Dili, Tomas Barros, nia parte entrega ona dadus vítima dezastre naturál liuliu família afetadu ba inundasaun hamutuk uma kain 10.336 ba Ministériu Administrasaun Estatál (MAE).

Notísia Relevante: Dadus provizóriu vítima dezastre naturál iha Don Aleixo 8.338

“Iha seunda (19/04) horisehik, ita entrega ona dadus vítima afetadu inundasaun liuhosi prenxe formatu dahuluk nian ne’ebé foka liu kona-ba vítima nia uma estraga totál ka kmaan ne’e hamutuk 10.336 ba MAE,” Tomas Barros informa ba jornalista TATOLI, iha nia knaar fatin Postu Administrativu Dom Aleixo, Fatuhada Dili, kuarta ne’e.

Hosi total dadus 10.336 ne’e, vítima ne’ebé afetadu ba inundasaun hosi Suku Comoro ne’e xefe família hamutuk 3.757, Manleuana iha xefe família 978, Madohi iha xefe família 1.247, Fatuhada iha xefe família 899, Bebunuk iha xefe família 494, Kampung Alor iha xefe família hamutuk 1.519 no Suku Bairru Pite iha xefe família hamutuk 1.442.

“Dadus hirak ne’e, foin mak formatu dahuluk nian. Ba formatu daruak no datoluk nian seidauk tanba ita-nia Governu hakarak entrega uluk lai lista afetadu inundasaun nian depois mak xefe aldeia no xefe suku sira rekolla tan dadus estragu ba infraestrutura no mós empreza ruma nia loza nia sasán hetan estrau. Agora ita foka ba lista afetadu dezastre naturál ne’ebé afeta ba vítima sira-ne’ebé sira-nia uma hetan estragu,” nia dehan.

Maske nia parte submete ona dadus vítima dezastre naturál ba Governu, maibé dadus ka lista adisionál kontinua tama nafatin. Nia parte sei orienta nafatin xefe suku no xefe aldeia sira hodi kontinua halo levantamentu dadus kona-ba infraestrutura hetan estragu no empreza privadu sira-nia fatin ka sasán ruma ne’ebé hetan.

Notísia Relevante: Empreza PAX apoiu kamioneta hitu tula lixu iha Don Aleixo

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here