Foos ne’ebé Governu prepara ba família afetadu dezastre naturál iha Lagoa Tasi-tolu (11/04). Imajen TATOLI/António Gonçalves

DILI, 21 abríl 2021 (TATOLI)—Sentru Lojístika Nasionál (CLN, sigla portugés) apoia ona foos saka 20.000 ba família afetadu dezastre naturál ne’ebé akontese iha domingu (04/04).

“Iha kalamidade ne’e, ita prepara foos ba  Ministériu Admistrasaun Estatál (MAE), Ministériu Solidaridade Sosiál no Inkluzaun (MSSI) no Sekretaria Estadu Protetasaun Sivíl (SEPS) hamutuk saka 20.000 ka tonelada 500 hodi tulun família afetdu iha situsaun emejénsia dezastre naturál,” Prezidente CLN, Agosto Junior Trindade, informa ba Agência TATOLI, via telefónika, kuarta  ne’e.

Aleinde ne’e, parte MAE, MSSI no SEPS sei kontinua halo identifikasaun, tanba ne’e parte CLN sei kontinua prepara foos hodi fornese ba komunidade ne’ebé presiza.

“Kada loron pedidu sempre mai no ami sei kontinua prepara foos ministeriu sira, maibé sei halo identifikasaun ba família sira ne’ebé presiza tulun,” nia akresenta.

Daudaun ne’e, armazen nasionál iha stock foos hamutuk tonelada 21.000-resin, ne’ebé antes ne’e importa hosi vietname hamutuk tonelada 30.000.

Antes ne’e, CLN hasai ona tonelada 28.000, tanba tuir despaisu Ministériu Koordenadór Asuntu Ekonómiku (MKAE) atu halo intervesaun merkadu ba fatin afetadu ba serka sanitária hanesan Bobonaro Covalima, inklui Rejiaun Administrativa Espesál Oé-cusse Ambeno (RAEOA) hamutuk tonelada 5.000.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here