Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, tersa (20/04). Imajen TATOLI/Egas Cristóvão.

DILI, 20 abríl 2021 (TATOLI)—Bankada Congresso Nacional de Reconstrução de Timorense (CNRT) sei kontribui ideia iha proposta Orsamentu Retifikativu (OR) liuhosi alterasaun Orsamentu Jerál Estadu (OJE) 2021.

Deputada Maria Fernanda Lay Lay, rekoñese iha momentu debate espesialidade OJE 2021 bankada CNRT deside walkout atu labele aprova buat ne’ebé laloos.

“Sorte momentu ne’e ami walkout atu labele ba aprova buat ne’ebé laloos, agora mak komprova (membuktikan) saida mak sira halo sala, sira rasik book-aan ladi’ak. Agora ami ba atu ajuda hadi’a, se sira hakarak rona ami. Se lakohi rona ami, entaun husik ba,” Deputada Bankada CNRT Maria Fernanda Lay, informa ba Agência TATOLI, iha Parlamentu Nasionál, kuarta ne’e.

Iha OJE 2021 ne’e inkonstitusionál, tan ne’e mak Bankada CNRT keixa ba Tribunál Rekursu maske ikus mai Tribunal Rekursu la konsidera.

Nia dehan, book-aan ladi’ak tanba ezekusaun seidauk to’o 25% maibé aprezenta ona proposta orsamentu retifikativu.

“Ami ajuda hadi’a fó hanoin liuhosi diskusaun iha plenária, nune’e Governu labele mai husu de’it osan,” nia fundamenta.

Iha loron 30 marsu liubá, Governu aprezenta proposta orsamentu retifikativu ho montante millaun $223,8 ba fundu COVID-19.

Entretantu Orsamentu Jerál Estadu (OJE) 2021 ne’ebé Parlamentu Nasionál aprova no Prezidente Repúblika promulga hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Notísia Relevante: Governu aprezenta Orsamentu Retifikativu millaun $223 ba PN

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here