Reprezentante Arsebispu Arkidioseze Metropolitana Dili, Pe. Paulos Maia, entrega materiál konstrusaun ba vítima dezastre naturál iha sentru evakuasaun Pre-Eskolár Santa Teresinha do Menino Jesus, Becora, Dili, kuarta (21/04/2021). Imajen Tatoli/Arminda Fonseca

DILI, 21 abríl 2021 (TATOLI)-Arkidioseze Metropolitana Dili, kuarta ne’e, fó apoiu materiál konstrusaun ba vítima dezastre naturál hamutuk 33 ne’ebé evakua ba iha Pre-Eskolár Santa Teresinha do Menino Jesus ho Eskola Báziku Sentrál Sabraka-Laran, Dili.

Notísia Relevante :  Don Virgílio: Traballadór Timoroan iha Austrália tulun vítima dezastre naturál

Reprezentante Arsebispu Arkidioseze Metropolitana Dili, Chancer Arsebispu Dioseze Dili, Pe. Paulos Maia, klarifika katak objetivu hosi apoiu konstrusaun materiál ba vítima sira-ne’e la’ós atu harii uma kompletu kedas ba vítima-sira, maibé oinsá atu hakmaan de’it terus ne’ebé sira enfrenta.

“Apoiu konstrusaun materiál ne’ebé ita fó ba vítima- sira la’ós atu harii uma ne’ebé perfeitu kedas ba sira, maibé atu hakmaan de’it sira-nia terus oinsá sira bele aguenta iha situasaun difisil ida-ne’e hodi hein apoiu hosi ita-nia Governu,” Pe. Paulos Maia  hateten iha ámbitu fó apoiu material konstrusaun ne’e ba vítima-sira dezastre naturál iha   Igreja Bee-dois, Becora, Dili.

Pe. Paulos Maia hateten, apoiu sira-ne’e la’ós mai direta hosi Arkidioseze Dili maibé  orsamentu apoiu hosi Timor-oan sira ne’ebé servisu iha rai-li’ur hanesan Irlanda, Austrália no Korreia do Sul, ne’ebé  haruka osan mai Dioseze Dili mak jere hodi sosa fali sasán hodi distribui liuhosi Parókia ba vítima-sira.

“Ita agradese ba Maromak no ita mós reza ba Maromak atu fó isin di’ak ba Timor-oan sira hotu ne’ebé servisu iha rai-li’ur tanba tulun ona ita iha situasaun kalamidade ida-ne’e,” nia tenik.

Materiál konstrusaun ne’ebé Arkidioseze Dili ohin fahe ba vítima sira mak hanesan, kalén, besi-kotak, besi-riin, parafuzu, besi-kotak  no simente.

“Apoiu ne’e ne’ebé ita ohin fó ba vítima, la’ós to’o iha ne’e de’it maibé ita sei ajuda mós ba vítima sira seluk iha Dili laran inklui ba munisípiu sira ne’ebé afetadu hotu ba inundasaun,” nia hateten.

Amu Pároku Igreja Bee-dois, Pe. Alberto Franco Morato, agradese tebes ba Arkidioseze Dili nia apoiu konstrusaun materiál ba vítima-sira tanba iha situasaun difisil ida-ne’e vítima sira presiza duni apoiu.

Nia hatutan, vítima dezastre naturál ne’ebé evakua ba iha sentru evakuasaun Eskola Bee-dois foufoun hamutuk uma-kain 58, maibé hafoin Pároku hamutuk ho xefe Aldeia haat hosi Suku Bee-dois nian halo verifikasaun uma-kain 33 mak uma hetan estragu totál 25 hetan estraga kmaan.

Sasán ne’ebé Arkidioseze Dili fó apoiu vítima-sira liuhosi Parókia Bee-dois sei fahe  tuir vítima sira-nia uma medida ne’ebé hetan estraga hosi inundasaun, ba uma boot simu kalén 60 no uma-kiik kalén 40 no materiál sira seluk hanesan besi simu hanesan  de’it.

Nia afirma, ba vítima-sira ne’ebé ohin simu ona daudaun materiál konstrusaun sira seidauk bele fila ba sira-nia hela fatin tanba vítima sira-nia fatin daudaun ne’e la soi ona atu hela.

Iha fatin hanesan, reprezentante vítima dezastre naturál, Alarico da Costa, lori vítima dezastre naturál hotu iha Eskola Bee-dois no iha Eskola EBC Sabraka-Laran hato’o agradese ba Dioseze Dili tanba iha situasaun difisil ida-ne’e parte igreja bele tulun sira liuhosi nesesidade báziku, inklui materiál konstrusaun.

Jornalista    : Arminda Fonseca

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here