Assosiasaun profisionál Saúde Timor-Leste (APSTL) hala’o konferénsia imprensa, iha sede AMTL Bidau Tokobaru, (21/04/21). Imajen/APSTL.

DILI, 21 abríl 2021 (TATOLI)—Assosiasaun profisionál Saúde Timor-Leste (APSTL), kondena no hakribi  agresaun fízika, asédiu seksuál no ameasa hasoru médiku-sira durante hala’o asisténsia médika iha territóriu TL.

Kondenasaun ne’e relasiona ho insidente agresaun fízika iha 19 abríl 2021, hasoru doutór Jubelino Deogratia Cardoso de Jesus, nu’udár médiku jerál no médiku Koordenadór ba kuarentena Polo Suai, Covalima, médiku Vijilánsia Munisípiu Covalima, asédiu seksuál no ameasa iha 20 abril, hasoru doutora Olga Benevides Moniz, médika jerál iha Postu Saúde Laulara, durante ezerse sira-nia knaar tuir sira-nia profisaun.

Notísia relevante:Hakanek médiku, PNTL sei prosesa suspeitu bainhira rekopera hosi COVID-19

“Hahalok krimi sira-ne’e mós akontese ona iha tempu pasadu hanesan iha HNGV, iha Maubisse Ainaro ne’ebé baku pesoál saúde, iha Baucau ne’ebé rezulta pesoál saúde balun liman kotu, iha fatin kuarentena halo presaun psikolójika ba pesoál saúde no fatin seluk tan iha rai doben TL,” Prezidente Asosiasaun  Enfermeiru Timor-Leste, José Dionizio Ximenes, hateten liu hosi konferénsia imprensa, iha sede AMTL Bidau Tokobaru, kuarta ne’e.

José Dionizio Ximenes hatutan, ho situasaun ne’e profisionál saúde-sira hili dalan nonok, hodi halo mós reflesaun no avaliasaun ba serbisu profisionál, hodi hadia an internamente, atu fó serbisu di’ak liu tan iha futuru.

“Maibé, iha tempu ida-ne’e ami nu’udár umanu espresa ami-nia sentimentu tristeza boot ida no laran susar tebes. Ami-nia solidariedade ba ami-nia maluk médiku na’in-rua ne’ebé foin hetan agresaun,” nia espresa.

Assosiasaun Profisionál Saúde hotu iha TL hanesan Assosiasaun Médiku, Assosiasaun Enfermeiru, Assosiasaun Saúde Públika, Assosiasaun Dentaria, Assosiasaun  Nutrisionistas, Assosiasaun Parteira, Assosiasaun Analista, Assosiasaun Farmasista nu’udár organizasaun profisionál independente, laiha afiliasaun polítika, no sai mahon ba membru, lamenta teb-tebes ho aktu kriminál ne’ebé la dignifika no dezvaloriza pesoál saúde-sira nia profisaun iha nia-rain rasik, maske profisionál saúde oferese ona sira-nia vida hodi halo knaar ho imparsialidade, transparénsia no independente, hodi fó atendimentu durante oras 24 kada semana ba ema hotu-hotu.

Tanba ne’e, liu hosi biban ida-ne’e, APSTL hatuur pozisaun primeiru, protesta kontra esklaresimentu hosi entidade balun ne’ebé koko atu defende, proteje hahalok brutalizmu no premanizmu hasoru sidadaun sivíl, liu-liu pesoál saúde iha ninia knaar fatin.

Segundu, ejize autoridade kompetente atu foti imediatamente medida legá konkreta, ho maneira objetiva, profisionál no transparente, hodi husu responsabilidade ba ema ne’ebé halo agresaun fízika hasoru médiku na’in-rua ne’e, tuir norma legál ne’ebé aplika iha RDTL.

Terseiru, ejize ba órgaun Governo atu garante seguransa no proteje nafatin profisionál saúde-sira durante hala’o sira-nia knaar tuir sira-nia profisaun iha territóriu TL.

Kuartu, husu ba polítiku na’in-sira atu keta kahur serbisu profisionál ho polítika iha TL, no husik profisionál saúde hala’o serbisu tuir siénsia no juramentu ne’ebé sira halo ona.

Kintu, konvida entidade no sosiedade sivíl iha TL atu tau-matan no akompaña nafatin prossesu legál ba kazu refere, atu nune’e bele ezekuta tuir norma legál, ne’ebé profisionál no transparente, hodi nune’e asaun brutalizmu, ba populasaun, liu-liu profisionál saúde-sira, labele akontese tan iha nasaun ne’e.

Sestu, husu ba komunidade TL atu fó konfiansa nafatin ba profisionál saúde hodi serbisu ho profisionál ema hotu.

Sétimu, APSTL fó tempu loron tolu hahú oras ida-ne’e ba Ministériu Saúde no Ministériu Públiku hodi prosesa kazu Suai ba dalan legál no buka husu deskulpa ba profisionál saúde, bainhira liu loron ida-ne’e, APSTL sei halo asaun pasífika hodi ezije direitu protesaun tuir kovensaun direitu umanu no Konstuisaun RDTL.

Oitavu, hakarak enkoraja no husu ba profisionál saúde-sira iha rai doben TL atu labele lakon espíritu no vontade serbisu hodi serbí komunidade, hatudu nafatin profisionalizmu hodi hala’o knaar ne’ebé sagradu ba povu TL ho imparsialidade, transparánsia no independente.

Jornalista: Felicidade Ximenes

Editór: Cipriano colo

HAKEREK NO HATÁN

Please enter your comment!
Please enter your name here