Kondisaun Mota Comoro bainhira inundasaun iha domingu (04/04). Imajen TATOLI/António Gonçalves

DILI, 21 abril 2021 (TATOLI)—Hafoin akontese dezastre naturál iha domingu (04/04/2021) foin lalais ne’e, Governu liuhosi Ministériu Administrasaun Estatál fo orientasaun ba administradór munisipál no xefe suku sira halo levantamentu dadus hodi rekolla komunidade nia uma ne’ebé afetadu ba inundasaun. 

Notísia Relevante: Administradór Nain Feto submete dadus uma kain ualu ba MAE

Administradór Postu Administrativu Nain Feto, Munisípiu Dili, Tomas Brás, informa dadus vítima dezastre naturál ne’ebé xefe suku rekolla hamutuk xefe família 1.535 ne’e, nia parte submete ona ba Ministériu Administrasaun Estatál (MAE) semana kotuk.

“Ami Postu Na’in Feto submete lista afetadu dezastre naturál ne’ebé afeta ita-nia populasaun iha suku neen ho nia xefe família hamutuk 1.535 ba MAE semana kotuk no ita hein prosesu tuir mai hosi ita-nia Governu,” Tomas Brás hatete Ajénsia TATOLI, liuhusi telefónika, kuarta ne’e.

Administradór Tomas subliña hosi totál família afetadu 1.535 ne’e hotu-hotu maihosi formatu dahuluk nian no fotmatu daruak-datoluk nian sei iha prosesu rekollamentu hosi autoridade komunitária sira iha terrenu.

“Kona-ba formatu daruak no datoluk nian ita-nia xefe aldeia no xefe suku kontinua halo aproximasaun no dada-lia kona-ba sasán estragu ba família afetadu sira. Ho nune’e, ha’u hanoin presiza tempu mak bele finaliza dadus ne’e,” nia dehan.

Hosi dadus vítima dezastre naturál hamutuk uma kain 1.535 ne’e, rekolla hosi hosi Suku Acadiru-Hun uma-kain 787, Bidau Lecidere iha uma kain 275, Bemori iha uma kain 19, Gricenfor iha uma kain 84, Santa Crúz iha uma kain 201 no Suku Lahane Orientál iha uma kain 196.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here