Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, tersa (20/04). Imajen TATOLI/Egas Cristóvão.

DILI, 20 abríl 2021 (TATOLI)—Primeiru-Ministru (PM), Taur Matan Ruak, agradese ba Deputadu sira iha Parlamentu Nasionál (PN) ne’ebé apoia aprova Orsamentu Retifikativu 2021 iha faze  jeneralidade.

“Ha’u lori Governu tomak nia laran agradese ba apoiu Deputadu sira, ne’ebé riku tebes ho rekomedasaun no krítika ba Governu atu ezekuta orsamemntu ho di’ak,” Xefe Governu hateten iha sala plenária PN, hafoin votasaun tersa ne’e.

PN aprova Orsamentu Retifikativu ho votu favorável 43, abstensaun 21 no kontra zero.

Nune’e, PM Taur kompromete atu ezekuta Orsamentu Retifikativu 2021 ho di’ak hodi rezolve situasaun kalamidade COVID-19 no dezastre naturál iha Timor-Leste.

“Ha’u kompromete ho Governu nia naran atu ezekuta orsamentu ne’e hodi di’ak, bainhira iha aprovasaun finál globál,” Xefe Governu kompromete.

Entretantu, Iha proposta Orsamentu Retifikativu liuhosi alterasaun Orsamentu Jerál Estadu (OJE) 2021 prevee millaun $51,9 ba traballadór liña frente no millaun $31 finaliza programa Cesta Bázika iha territóriu nasionál.

Tuir relatóriu no paresér hosi Komisaun C (Finansa Públika) katak totál Orsamentu Retifikativu hamutuk millaun $223,8 ne’ebé realokasaun verba hosi Fundu Infraestrutura ho valór millaun $62 no realokasaun hosi verba Dotasaun Todo Governu ho montante millaun $26,5 inklui integrasaun saldu jerénsia ne’ebé la inskritu (não inscritos) iha OJE 2021 ho montante millaun 135,3.

Hosi montante millaun $223,8 koloka atu kombate no halo prevensaun pandemia COVID-19 ho valór millaun $51,2, medida apoia sósiu-ekonómika millaun $81,7, finalizasaun pagamentu Cesta Bázika millaun $31, atribuisaun suplementu remuneratóriu ba traballadór liña frente millaun $51,9 no dotasaun kontinjénsia ba fundu COVID-19 millaun $8.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here