Mariana Mendonça, nu’udar abitante ida ba vítima dezastre naturál, 04 abríl 2021. Imajen Tatoli/Arminda Fonseca

DILI, 20 abríl 2021 (TATOLI)- Vítima dezastre naturál uma-kain-29 ne’ebé muda hosi sentru evakuasaun João Paulo II, Tasi-Tolu, Dili, mai iha Sentru evakuasaun Eskola Báziku Filial 1.2 Siklu 5 Comoro, husu Governu atu bele apoiu materiál konstrusaun ba sira.

Notísia Relevante : Vítima dezastre naturál iha Eskola UNAMET husu ai-han no ropa

Mariana Mendonça, nu’udar abitante ida ba vítima dezastre naturál, 04 abríl ne’e, hateten karik bele Governu apoiu lalais materiál konstrusaun ba vítima dezastre natural sira ne’ebé sira-nia uma hetan estragu total atu bele ba hadi’a daudaun ona atu fasilita bele sai daudaun ona hodi sentru evakuasaun.

Mariana Mendonça ba Agência TATOLI iha EBF 5, Comoro, Dili, tersa ne’e, hateten sira presiza tebes Governu nia apoiu kona-ba materiál konstrusaun, tanba sira-nia hela fatin hetan estragu total no kondisaun iha sentru evakuasaun la garante sira-nia oan sira nia saúde tanba toba de’it iha simente leten.

“Ami ta’uk mak labarik-sira hetan moras dengue ka mear tanba aula eskola nian ne’ebé ami uza nakonu ho susuk. Maske doutór sira mai halo konsulta ba labarik sira fó ai-moruk, maibé hanesan de’it tanba ami toba nafatin iha rai ka simente-leten,” nia hatutan.

Iha fatin hanesan, vítima dezastre naturál Novita de Araújo, husu ba Governu, atu kria lalais fatin seguru ruma ba sira tanba fatin ne’ebé sira hela daudaun ne’e di’ak, maibé hela kleur fó impaktu ba labarik sira-nia saúde.

“Ami hatene situasaun ne’ebé akontese ne’e nu’udár dezastre ida, maibé karik bele Governu tenke halo esforsu sedu, nune’e labarik ki’ik-oan labele sai vítima tanba moras sira,” Novita de Araújo hateten.

Kona-ba hahán, nia dehan, iha sentru evakuasaun ne’ebé sira hela la kuran ba ai-han, tanba hahán sira han tuir sira-nia hakarak, maibé difikuldade ne’ebé sira enfrenta mak Governu liuhosi Sekretária Estadu Protesaun Sivíl (SEPS)  ne’ebé sábadu (17/04), fó apoiu ba vítima dezastre naturál iha Lagoa Tasi-Tolu, Dili, maibé sira-nia naran laiha hotu.

“Ami senti triste mak Governu foin lalais ba fó apoiu ba vítima dezastre naturál iha Tasi-Tolu, maibé ami uma-kain 29 ne’ebé daudaun ne’e hela iha EBF Comoro la hetan buat ida, maske ami hatama tuir rekizitu ne’ebé lideransa komunitáriu sira husu,” Novita de Araújo  tenik.

Agradese Governu 

Hosi sorin seluk, Aleixo dos Santos, nu’udar mós vítima dezastre naturál hosi Aldeia 12 de Outubru, Suku Comoro, Postu Administrativu Don Aleixo, Munisípiu Dili, agradese tebes ba Governu liuhosi Sekretáriu Estadu Protesaun Sivíl fó ona apoiu nesesidade báziku ba sira.

“Ha’u kontente no agradese ba Governu ne’ebé distribui ona nesesidade báziku ba ami vítima dezastre naturál,” Aleixo dos Santos, hateten  ba jornalista sira hafoin simu nesesidade báziku iha Lagoa Tasi-Tolu, Dili, sábadu (17/04).

Ba nesesidade báziku ne’ebé  Governu distribui ba vítima dezastre naturál sira nia dehan, uitoan ka barak ida-ne’e mak esforsu Governu nian ajuda nia povu iha situasaun difisil ida ne’e.

Daudaun ne’e, Aleixo dos Santos  ho nia família hela viziñu nia uma iha Bairru BTN I, Aldeia 07 de Setembru, Suku Comoro, Dili.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here