Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 20 abríl 2021 (TATOLI)—Sala Situasaun Sentru Integradu Jestaun Krize (SIJK) liu hosi Koordenadór Forsa-Tarefa ba Prevensaun no Mitigasaun, Rui Maria de Araújo, lamenta ho sidadaun ne’ebé detetadu pozitivu COVID-19 iha kuarentena Polo Covalima, halo asaun violentu hasoru autoridade saúde.

“SIJK lamenta ho hahalok violentu ne’ebé hatudu hosi sidadaun-sira hasoru autoridade saúde,” Rui Maria de Araújo hateten liu hosi konferénsia imprensa iha CCD, tersa ne’e.

Notísia relevante:Hakanek médiku, PNTL sei prosesa suspeitu bainhira rekopera hosi COVID-19

Lamentasaun ne’e tanba tuir dadus hosi SIJK katak, iha 19 abríl, iha Munisípiu Covalima akontese insidente agresaun fízika hosi ema ne’ebé detetadu pozitivu iha kuarentena, hasoru profisionál saúde-sira.

Hanesan rezultadu, médiku responsável ba kuarentena iha Munsípiu Covalima kanek no tenki hetan atendimentu iha emerjénsia Ospitál Referénsia Suai no suku pontu rua iha parte oin.  

Nune’e mós, insidente ne’ebé mosu iha 17 abríl iha fatin kuarentena iha aeroportu Suai, bainhira sidadaun-sira ne’ebé detetadu pozitivu, lakohi koopera ho autoridade saúde atu lori ba izolamentu.

“Nune’e mós sidadaun-sira iha fatin kuarentena hanesan ne’ebé la pozitivu, oferese rezisténsia, no ikus-mai autoridade defeza ho seguransa tenki aplika forsa hodi impoin kumprimentu norma ho regra ne’ebé vigora iha prevensaun no mitigasaun ba surtu COVID-19,” nia subliña.

Hosi atuasaun hirak ne’e nia dehan, autoridade administrativa, autoridade saúde, forsa no serbisu seguransa iha Munisípiu Covalima, foti ona medida atu prevene labele akontese tan iha futuru.

Entretantu, Polísia Nasionál Timor-Leste (PNTL) liu hosi Komandu Munisípiu Covalima, fó-sai ona katak, sei prosesa suspeitu na’in-rua ne’ebé hakanek médiku ida iha kuarentena Polo, bainhira rekopera hosi COVID-19.

Notísia relevante:Pasiente COVID-19 hakanek médiku ida iha kuarentena Polo

Jornlista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here