Komandante PNTL Munisípiu Covalima, Superintendente António Maria de Sá. Imajen/Eugénio Pereira.

DILI, 20 abríl 2021 (TATOLI)—Komandu Polísia Nasionál Timor Leste (PNTL), Munisípiu Covalima, hala’o hela investigasaun ba atuasaun membru-sira hasoru estudante iha kuarentena Holbeli, Suai, Munisípiu Covalima, sábadu (17/04/21).

Komandante Munisípiu Covalima, Superitendente Polísia, António Maria de Sá, hateten, hafoin akontesimentu iha semana kotuk, nia parte orienta ona ekipa seksaun Investigasaun Kriminál, hodi halo investigasaun kle’an ba membru ne’ebé involve iha akontesimentu ne’e.

Notísia relevante:Komandu hein relatóriu atuasaun polísia iha kuarentena Covalima

“Ita bolu ona membru-sira no mós entidade-sira ne’ebé momentu ne’ebá hola parte iha fatin akontesimentu hanesan estudante ho pesoál saúde hodi presta deklarasaun. Oras ne’e daudaun iha hela prosesu investigasaun,’’ Superitendente Polísia, António Maria de Sá hateten ba jornalista Agência Tatoli via telefónika, tersa ne’e.

António Maria de Sá konta tuir kronolojia hosi akontesimentu katak, bazeia ba rezultadu teste swab, iha estudante balun pozitivu COVID-19, bainhira ekipa saúde hakarak foti ba izolamentu, maibé estudante balun tenta trava atu labele foti to’o halo agresaun fízika, nune’e membru seguransa halo auto-defeza.

Komandante ne’e mós klarifika katak, atuasaun seguransa-sira la’ós uza gás lakrimujéniu mak tiru ba estudante-sira, maibé uza x-gás atu evita ema barak labele impede prosesu evakuasaun pasiente.

Kona-bá ne’e, Komandu PNTL Covalima haruka ona relatóriu inisiál ba Komandu Jerál hodi bele akompaña prosesu investigasaun tuir-mai.

Tanba ne’e, nia dehan, investigasaun ikus mak determina sala ka loos ba atuasaun hosi membru seguransa.

“Kazu ne’e akontese iha jurísdisaun Covalima, ha’u orienta ona ekipa investigasaun kriminál atu kontinua halo investigasaun, bainhira termina mak bele hatene rezultadu,’’ nia subliña.

Horisehik, Komandu Jerál PNTL liu hosi Portavóz, Superintendente Xefe, Arnaldo Araújo,  hateten sei hein relatóriu kona-bá atuasaun membru balun hasoru estudante-sira, iha kuarentena Holbeli, mak bele foti asaun.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here