iklan

NASIONÁL, EKONOMIA, DILI, HEADLINE, POLÍTIKA

PN husu Governu hasai povu hosi COVID-19 no dezastre naturál

PN husu Governu hasai povu hosi COVID-19 no dezastre naturál

Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, tersa (20/04). Imajen TATOLI/Egas Cristóvão.

DILI, 20 abríl 2021 (TATOLI)—Reprezentante Povu iha uma fukun Parlamentu Nasionál husu no fó apoiu ba Governu atu hasai povu hosi propagasaun surtu COVID-19 no dezastre natural iha territóriu nasionál.

Notísia Relevante: PM husu apoia PN halo proposta rezolve estragu dezastre naturál

“Ami bankada Governu no mós Parlamentu Nasionál hamutuk deputadu na’in-65 sempre fó apoiu ba Governu, atu lori povu ne’e sai hosi situasaun surtu COVID-19 no dezastre naturál. Mezmu COVID-19 foin hamate ema na’in-rua (2) maibé dezastre naturál ne’’e hamate ona Timoroan liu na’in-40. Husu ba Timoroan hotu-hotu nia responsabilidade, sentimentu umanu, atu haree ba situasaun sira-ne’ebé mosu daudaun iha Timor-Leste,” Prezidente Komisaun C ne’ebé trata asuntu Finansa Públika, Deputada Maria Angélica Rangel, ko’alia liuhosi plenária, tersa ne’e.

Prezidente Komisaun C ne’e enkoraja VIII Governu Konstitusionál atu nafatin servisu hodi serví povu no rai ida-ne’e iha situasaun surtu COVID-19 no dezastre naturál ne’ebé kuaze harahun infraestrutura iha territóriu nasionál.

“Primeiru Ministru ho membru Governu tomak presiza haree didi’ak surtu COVID-19 no dezastre naturál. Hakarak dehan mós dezastre natural ne’ebé durante ne’e afeta ita-nia rain hahú hosi loron 4 abríl, ha’u husu ba Primeiru-Ministru atu tau atensaun totál,” nia dehan.

Daudaun ne’e membru Parlamentu Nasionál sira halo hela ezersísiu ba proposta no atu prevee osan ba dezastre naturál ne’e tanba ida-ne’’e kompeténsia Parlamentu Nasionál nian. Proposta ne’e sei submete ba Prezidente Parlamentu Nasionál nia meza, konforme Governu hakarak halo alterasaun hosi parte ne’ebé.

Notísia Relevante: PPN husu deputadu sira hatama proposta molok votasaun jeneralidade

Jornalista: Evaristo Soares Martins

Editór: Cancio Ximenes    

iklan
iklan

Leave a Reply

iklan
error: Content is protected !!