DILI, 20 abríl 2021 (TATOLI)–Primeiru Ministru (PM), Taur Matan Ruak, hateten hafoin observa estragu iha nível territóriu nasionál kauza hosi dezastre naturál ne’ebé akontes iha loron domingu (04/04), hatudu katak kualidade infraestrutura presiza re-organiza.
“Ita tenke kriminaliza ita-nia tékniku sira, tantu tékniku hosi Obra Públika no Ajénsia Dezenvolvimentu Nasionál (ADN) inklui ida ne’ebé envolve iha konstrusaun infraestutura iha ita nia nasaun no emprezáriu sira. Se ita hakarak sériu ba ita-nia an no seriu ba ema seluk,” PM Taur hateten iha sala plenária Parlamentu Nasionál (PN), iha ámbitu debate proposta orsamentu retifikatifivu iha faze jeneralidade, tersa ne’e.
Tuir PM, labele simu no justifika buat hotu, liuliu estragu infraestrutura tanba kauza dezastre naturál de’it maibé tenke envolve aktu responsabilidade.
Nune’e, Xefe Governu orienta ona membru sira hosi foku ba komportamentu ema bainhira atu halo mudansa konstante tanba hakarak responde situasaun no evolusaun iha nasaun ne’e, labele viola regra sira ne’ebé estabele ona.
“Ha’u rasik orienta ita-nia komportamentu ba situasaun ida-ne’ebé tinan ida no rua tuir malu ne’e iha prinsípiu tolu hanesan konsentra liu ba rezultadu no menus ba prosesu, konsentra liu ba ema do que burokrasia no ita tenke preparadu ba mudansa sira,” Xefe Ezekutivu afirma.
Daudaun ne’e, Governu preparadu hodi haruka ona proposta lei orsamentál jestaun finanseira ne’ebé bele ajuda kria ambiente konstante, tanba tuir PM, Governu labele lori regra no medida inklui prosedimentu antigu hodi responde ba dezafiu komum.
“Governu halo esforsu tomak atu halo mundansa iha ita-nia lei aprovizionamentu, liuliu kontratu sira tanba situasaun dezastre naturál tinan rua tuir malu ne’e fó lisaun boot ida mai ita, katak tenke organiza-an di’ak no tenke ejizente ba ita-nia an rasik hodi resposabiliza ita-nia an ba aktu hotu ne’ebé lori konsekuénsia ba sidadaun sira no nasaun rasik,” PM Taur subliña.
Estragu infraestrutura Estadu nian ho kustu esimasaun provizóriu millaun $168-resin, kompostu hosi ponte, estrada no moru ka barrajen.
Enkuantu, ba área eletrisidade lakon kuaze millaun $5, maibé presiza fundu millaun $7 atu rekupera tanba iha torre 16 mak ameansadu.
Ba infraestrutura bee-moos, iha estragu milaun $2,5 no presiza rekupera atu populasaun bele asesu bee.
Nune’e, presiza orsamentu millaun $225 atu halo rekuperasaun ba estragu kauza hosi dezastre naturál.
Jornalista: Florêncio Miranda Ximenes
Editora: Julia Chatarina
