Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 20 abríl 2021 (TATOLI)–Sekretáriu Estadu Kooperativa (SEKoop), Elizário Ferreira, konvoka enkontru ho Embaixadór Estadu Unidu Amérika (EUA) iha Timor-Leste, Charles Kevin Blackstone, hodi ko’alia kona-ba posibilidade kooperasaun iha área kooperativa.

Sekretáriu Estadu Elizário Ferreira, hateten durante enkontru Embaixadór hatudu disponibilidade atu tulun SEKoop dezenvolve kooperativa iha Timor-Leste.

“Sira hakarak identifika nesesidade, liu-liu iha área edukasaun no formasaun, dezenvolvimentu kooperativa produsaun iha área peska, agrikultura no turizmu, tanba ne’e ha’u hanoin sira sei bele reforsa tan kapitál ruma ba kestaun ne’e,” governante ne’e dehan, iha edifísiu Akait, tersa ne’e.

Maski nune’e, parte tékniku hosi Embaixadór EUA no SEKoop sei haree hodi halo diskusaun antes implementasaun programa.

“Resposta pozitivu, ba oin tékniku sira hosi parte rua sei tur hamutuk atu deskute proposta ka  hanoin sira ne’ebé maka ami hato’o ne’e,  nune’e Embaixada Amérika bele suporta programa SEKoop bainhira implemeta no Ajénsia Corpo da Pas (Mercy Corps) bele serbisu hamutuk hodi alkasa objetivu sira ne’e,” nia akresenta.

Daudaun SEKoop iha limitasaun rekursu umanu, ne’ebé presiza formasaun, koñesimentu no estudu komparativu.

Aleinde ne’e, Sekretáriu Estadu konsidera presiza apoiu fundu atubele hatan ba demanda kooperativa ninia no dezenvolvimentu produsaun ne’ebé presiza apoiu hosi parte hotu.

“Ami-nia esperansa, komunikasaun bele la’o di’ak nafatin hodi halo kooperasaun no ami hein katak sira iha vontade atu asegura komunikasaun no relasaun di’ak ne’ebé maka parte Governu hein,” nia hatutan.

Iha fatin hanesan, Embaixadór Charles Kevin Clackstone, hateten EUA bele apoiu atividade SEKoop liuhosi Mercy Corps.

Jornalist: Natalino Costa 

Editora: Julia Chatarina

HAKEREK NO HATÁN

Please enter your comment!
Please enter your name here