Membru Deputado iha Parlamento Nasional.Imajen Tatoli/Egas Cristóvão.

DILI, 20 abríl 2021 (TATOLI)—Bankada Congresso Nacional de Reconstruçao de Timorense (CNRT) kestiona ho Orsamentu Jerál Estadu (OJE) 2021 ne’ebé aumenta ho Orsamentu Retifikativu (OR) sa’e ba biliaun $2.165,1.

Notísia Relevante: Governu aprezenta Orsamentu Retifikativu millaun $223 ba PN

Orsamentu orijinál 2021 ne’ebé aprovadu no promulgadu ho montante billaun $1.895 no agora aumenta ho proposta orsamentu retifikativu millaun $223,8.

Deputada Bankada CNRT, Carmelita Caetano Moniz, hateten ezekusaun OJE 2021 oras ne’e foin atinje 20%, tanba kuandu liuhosi trimestre dahuluk iha tinan fiskál ida tenke atinje 25% ba leten.

“Ho ezekusaun mínimu hanesan ne’e, Governu mai husu tán aumentu sa’e tiha ba biliaun $ 2.1. Governu nia kapasidade ezekusaun mínimu maibé Governu hakarak mai husu tán,” Deputada Carmelita Caetano Moniz, levanta liuhosi plenária, tersa ne’e.

Loloos ne’e, nia dehan, medida implementasaun aprova de’it iha Konsellu Ministru maibé Governu lori ba Parlamentu Nasionál mak aprova.

Notísia Relevante: PM husu apoia PN halo proposta rezolve estragu dezastre naturál

Deputada Bankada CNRT seluk, Virgínia Ana Belo mós lamenta proposta Governu nian husu aumenta liuhosi alterasaun OJE 2021.

“Iha orsamentu retifikativu ne’e Governu mai husu aumentu millaun $223,8 hodi aumenta tán ba orsamentu orijinál, no integrasaun saldu jerénsia ne’ebé la inskritu (não inscritos) iha OJE 2021 ho montante millaun $135,3. Montante orsamentu ida-ne’e subar hela no agora foin mak deteta, ne’e estrañu,” Deputada Virgínia Ana Belo kestiona.

Tuir proposta-alterasaun hosi Governu nian husu halo alterasaun ba tabela I, II, no III anexa ho Lei númeru 14/2020, 29 dezembru, hodi reforsa fundu COVID-19, ho kompensasaun iha aumentu reseita dekorrente integrasaun saldu jerénsia não escritos no redusaun dotasaun orsamentál Fundu Infraestrutura no dotasaun Governu tomak.

Purtantu reseita konsolidada hosi setór públiku administrativu atuál to’o biliaun $2.245,6 no reseita órgaun no servisu administrasaun sentrál ho totál billaun $1. 932.5

Entretantu despeza órgaun no servisu administrasaun sentrál biliaun $1.932,5 ho klasifikasaun ekonómika ne’ebé koloka millaun $229,7 ba saláriu no vensimentu, millaun $573,4 ba bens no servisu, millaun $716,0 ba transferénsia públika, millaun $55,1 ba kapitál menór no millaun $358,4 ba kapitál dezenvolvimentu. Nune’e aumenta tán ho millaun $223,8 sa’e ba billaun $2.1

Notísia Relevante: Governu presiza millaun $200 responde dezastre naturál

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here