Apoiu umanitáriu hosi Nova Zelándia ho kuantidade kilograma 7.460 to’o ona Aeroportu Comoro, ho aviaun Royal Forsa Aero Nova Zelándia. Imajen Tatoli/António Gonçalves.

DILI, 20 abríl 2021 (TATOLI)—Apoiu umanitáriu hosi Nova Zelándia ho kuantidade kilograma 7.460 to’o ona Timor-Leste (TL), ho aviaun  Royal Forsa Aero Nova Zelándia.

Apoiu ne’e tama iha pakote orsamentu ne’ebé Governu Nova Zelándia oferese ba TL ho montante millaun $1.4, hodi rekopera dezastre naturál iha 04 abríl no mós prevensaun COVID-19.

Notísia relevante:Nova Zelándia oferese rihun $400 ba UNICEF hodi hatán ba emerjénsia iha TL

Ministra Negósiu Estranjeiru Nova Zelándia, Nanaia Mahuta, hateten liu hosi komunikadu katak, apoiu ne’e atu tulun di’ak liu-tan TL, hodi ultrapasa situasaun difísil ne’e.

“Ami hamutuk ho povu Timor-Leste ne’ebé hetan impaktu hosi bee-sa’e makaas no rai halai iha momentu ne’ebé nasaun ne’e mós jere hela kazu COVID-19,” Nanaia Mahuta haktuir.

Apoiu ne’e inklui ekipamentu protesaun pesoál (PPE), sasan ijiéne família, sasan ba inan no labarik kiik, ai-moruk ba halo moos bee, bomba bee no lámpada sólares.

PPE ne’e inklui protetór ba oin, luvas, máskra, oklu protesaun, materiál ba swab no roupa médiku ne’ebé sei distribui hosi Serbisu Autónomu Medikamentu no Ekipamentu Saúde (SAMES).

UNICEF sei serbisu hamutuk ho Governu TL atu distribui ekipamentu sira-ne’e ba sira ne’ebé presija liu.

Nova Zelándia fó kontribuisaun ba Programa ai-han Mundiál hodi apoia transporte no distribui sasan sokorru, ba vítima inundasaun iha Dili inklui distritu afetadu-sira.

Nova Zelándia mós sei serbisu hamutuk ho Organizasaun Naun Governamentál (ONG) sira hodi responde ba problema inundasaun, inklui responde imediata ba umanitária no atividade-sira rekoperasaun termu médiu.

Jornlista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here