BTL, E.P fornese bee-moos ba Komunidade iha Kintal Bot, ho Mobile Tank, ne’ebé atendimento ne hala’o tamba estasaun distribuisaun iha Mascareñas ne’ebé fornese bee iha área Kintal Boot, Kintal kiik, Santa Cruz, Audian, Bemori no Mascareñas avaria kauza hosi inundasaun. Imajen/BTL

DILI, 19 abríl 2021 (TATOLI)—Dezastre naturál ne’ebé akontese foin lalais ne’e estraga kanalizasaun bee-moos, nune’e fornesimentu bee ba komunidade kuaze paradu hotu, maibé daudaun hahú rekupera hikas.

“Sistema kaptasaun maioria seidauk rekupera hotu, foin rekupera rua hanesan Namamauk no Lahane ne’ebé fornese bee ba ospitál Lahane no komunidade sira besik iha ne’ebá, restu seidauk konsege,” Prezidente Konsellu Administrasaun Bee Timor Leste, Empreza Públika (BTL, E.P), Carlos Peloi dos Reis, informa ba Agência TATOLI, iha edifísiu Ministériu Finansa, segunda ne’e.

Maski nune’e, ekipa tékniku BTL kontinua serbisu maka’as iha terrenu hodi hadi’a estragu infraestrutura sira.

Aleinde ne’e, BTL konsege normaliza sistema distribuisaun bee-moos hamutuk 25 iha sidade Dili, ne’ebé hetan estragu.

Notísia relevante: BTL, E.P hadi’a hotu ona sistema bomba bee 26 ne’ebé hetan estragu

“Iha 26 bomba iha Dili, ita konsege rekupera ona 25 maibé ida mak sei iha prosesu. Signifika 25 ne’e ba komunidade lubuk ida mak komesa asesu fali bee-moos, inklui bomba iha Bidau Masaur, Mascareñas, Comoro, Bekusi mota klaran. Ida ita la konsege rekupera mak Camea ne’e de’it,” Prezidente Konsellu Administrasaun  BTL dehan.

Tuir Responsável ne’e, daudaun ne’e foku uluk ba estragu naton sira no bainhira normaliza hotu ona mak foin kontinua hadi’a estragu boot sira, tanba ekipa tékniku la sufisiente atu halo hotu dala ida.

Enkuantu, hosi estragu sira-ne’e, iha sistema bee-moos rua mak kanaliza ba nasionál no sistema ne’ebé halo inter koneksaun Lakoto no Mutudare.

“Atu rekupera dalaruma ita presiza tempu to’o fulan rua ka tolu, maibé hanesan Lakoto nian dalaruma bele fulan ida ka fulan ida ho balun mak ita foin bele rekupera tanba ita-nia kapasidade limitadu tebes,” nia hatutan.

Tuir dadus provizóriu BTL, sistema distribuisaun bee-moos ne’ebé a’at kuaze 50%, ne’ebé korresponde ho kustu millaun $2,7-resin.

Daudaun ne’e, komunidade sira ne’ebé seidauk asesu bee-moos, BTL hamutuk ho parseiru destaka tanke bee iha bairru hodi komunidade sira bee foti.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here