Jornalista sira hatudu kartaun vasina hafoin simu vasina AstraZeneca, iha Palásiu Governu, segunda (19/04). Imajen/Natalino Costa

DILI, 19 abríl 2021 (TATOLI)Sekretaria Estadu Komunikasaun Sosiál (SEKOMS) fasilita jornalista  sira hodi hetan vasina AstraZeneca, tanba knaar jornalista sira hasoru fontes ne’ebé bele hetan risku ba propagasaun COVID-19.

“Ohin ne’e ita fasilita tan ita-nia jornalista ho maluk frontline sira hamutuk 102, ne’ebé balun hahú tiha ona iha Sentru Konvesaun Dili (CCD, sigla portugés). Iha tempu badak ne’e, ita bele fó oportunidade uluk ba ita-nian frontline,” Sekretáriu Estadu Komunikasaun Sosiál, Merício Juvinal dos Reis ‘Akara’, hateten iha Palásiu Governu, segunda ne’e.

Governante ne’e enkoraja jornalista sira hodi simu hotu vasina tanba balun tauk no lakohi simu vasina.

“Agora ha’u rona frontline balun seidauk prontu simu vasina, espera ita hotu tenke iha konsiénsia no prontu fó ezemplu ba sidadaun sira, tanba ita-nia Primeiru-Ministru, eis Prezidente Repúblika Señor Ramos Horta, Amo Bispu no líder sira seluk fó ona ezemplu, entaun agora ita servisu iha mídia se bele fó ezemplu ba ita-nia sidadaun sira,” nia akresenta.

Nia konsidera, atu rezolve COVID-19 dalan di’ak liu maka prevene-an liuhosi vasinasaun atu hasae imunidade kontra vírus.

Iha sorin seluk, Xefe Redasaun Lafaek News, Acacio Pinto, hateten, hanesan timor-oan ida no knaar hanesan jornalista, prontu simu uluk vasina AstraZeneca, tanba ne’e mídia online ne’e organiza malu hodi hotu-hotu simu vasina.

“Ita hotu hatene katak vasina ne’e la’ós buat foun ba Timór tanba uluk ita sei ki’ik mós simu ona vasina, tanba ne’e sente hanesan baibain no vasina ida-ne’e bele haforsa ita-nia imunidade,” nia akresenta.

Iha biban ne’e, nia husu Governu tenke halo sosializasaun maka’as liután.

Nune’e mós, Jornalista Mateus Lopo, hateten, nia parte sente di’ak baihira simu vasina.

“Ha’u sente di’ak hela bainhira simu vasina no la akontese buat ruma, dala barak ema dehan vasina hotu iha minutu balun nia laran iha reasaun ruma maibé liu ona minutu hirak ne’e sente baibain hela,” nia dehan.

Jornalista frontline ne’ebé simu vasina hosi Rádiu Televizaun Timor-Leste, Empreza Públika (RTTL, E.P), Agência TATOLI.IP, GMN-TV, TVE, Independente, Timor Post, Timor News, Business Timor, Tempo Timor, Dili Post, Naunil, Rádiu LABEH no Loluwari.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here