Ministru Administrasaun Estatál, Miguel Pereira de Carvalho hamutuk ho Reprezentante Rezidente UNDP iha Timor-Leste, Munkhtuya Altangerel UNDP ho MAE asina dokumentu projetu kona-ba COVID ba eleisaun reziliente iha Timor-Leste (CORE-TL), iha Caicoli,. segunda (19/04). Imajen Tatoli/Egas Cristóvão.

DILI, 19 abríl 2021 (TATOLI)—Programa Nasaun Unida ba Dezenvolvimentu (PNUD, sigla inglés), ohin, asina dokumentu projetu ho Governu Timor-Leste hodi lansa projetu foun ho naran COVID-Resilient Elections in Timor-Leste (CORE-TL) ne’ebé realiza iha salaun VIP Ministériu Administrasaun Estatál (MAE), Colmera, Dili.

Reprezentante Rezidente PNUD iha Timor-Leste, Munkhtuya Altangerel, hateten asina dokumentu projetu ne’e atu apoiu Governu liuliu Sekretáriadu Tékniku Administrasaun Eleitorál (STAE, sigla portugés) no Komisaun nasionál Eleisaun (CNE) atu realiza eleisaun ne’ebé rezilente ba COVID-19 no inkluzivu iha nivel nasionál no munisipál.

“Ohin, asina dokumentu projetu ho Governu Timor-Leste ne’e atu fó apoiu ba STAE no CNEm atu bele realiza eleisaun ne’ebé reziliente ba COVID-19 no inkluzaun iha nivel nasionál no munisipál. Projetu ne’e finansiadu hosi doasaun tokon $4 hosi Governu Japaun no mós rihun $300 hosi Governu Timor-Leste ato sosa tinta eleisaun no mós hala’o programa edukasaun eleitorál,” Munkhtuya Altangerel hateten liuhosi komunikadu imprensa ne’ebé Agência Tatoli asesu, segunda ne’e.

Tanba, nia hatutan, husi populasaun tokon 1.3 Timor-Leste iha eleitór 829,236 (63%) ho prosedimentu votasaun kada ema no kontajen iha loron-hanesan, eleisaun iha ameasa COVID-19 tanba sei halibur ema-barak. Relasiona ho ne’e, projetu CORE-TL sei asegura munisipiu hotu inklui RAEOA iha infraestutura votasuan ne’ebé reziliente hasoru COVID-19, inkluzivu no ambientalmente amigável.                            

Total projetu ho tokon $4.3 sei rezolve kestaun reziliénsia longu-prazu no mós ameasa pandemia; fornese inovasaun eleitorál no konsiensializasaun informasaun COVID-19, no fó asisténsia ba orgaun administrasaun eleitorál ho dezenvolvimentu prevensaun nesesáriu no planu resposta.

“COVID-19 kria tiha ona normalidade-foun, tanba ne’e presiza atu reforsa parseria no hanoin inovativu kona-ba integrasaun reziliénsia iha prosesu demokrasia no infraestutura. PNUD sei implementa projetu refere ho kolaborasaun ho Ajénsia Nasaun Unida seluk, parseiru dezenvolvimentu, sosiedade sivil no academia,” Munkhtuya Altangerel hateten.

Iha biban hanesan, Enkaregadu Asuntu Embaixada Japaun, Hirashima Shusaku, hateten povu no Governu Japaun apoiu Timor-Leste ho parseiru UNDP sei kontribui ba prosesu demokrasia iha Timor-Leste.

“Japaun apoiu tiha ona Timor-Leste nia demokrasia durante tinan 20, hahú kedas iha tinan 2001 bainhira Asembleia Konstituente akontese. Ami espera projetu ne’e realiza ho parseria ho UNDP no sei kontribui mós ba prosesu demokrasia Timorense, maske iha situasaun difisil ho pandemia COVID-19,” nia dehan.

Aleinde ne’e, Ministru Administrasaun estatál, Miguel de Carvalho Perreira, hateten COVID-19 hamosu buat hirak ne’ebé nunka akontese iha pasadu, maibé definitivamente nesesita (refere ba projetu CORE-TL) atu hametin demokrasia Timor-Leste.

“Maske ita iha situasaun epidemolojiku maibe demokrasia tenke saudavel nafatin,” Ministru ne’e hateten.

Iha serimónia asinatura ne’e, marka prezensa hosi Ministru Administrasaun Estatál Miguel Pereira de Carvalho, Enkaregadu Asuntus Embaixada Japaun Hirashima Shusaku, Reprezentante Rezidente PNUD iha Timor-Leste Munkhtuya Altangerel, Prezidente Komisaun Nasionál Eleisaun (CNE, sigla portugés) Alcino Araújo Barris no Diretór Jerál STAE, Acilino Manuel Branco.

Notísia Relevante: MAE-UNDP asina dokumentu projetu eleisaun reziliente ba COVID-19

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here