Kondisaun iha Masin Lidun, Lagoa Tasi-Tolu, segunda (19/04). Imajen TATOLI/António Gonçalves

DILI, 19 abríl 2021 (TATOLI)—Governu liuhosi ekipa téknik, daudaun ne’e buka hela rai hodi estabelese bairru provizóriu ba populasaun iha Tasi-Tolu ne’ebé daudaun hela iha sentru evakuasaun tanba hetan impaktu maka’as hosi inundasaun ne’ebé mak akontese iha domingu (04/04).

Vise Primeiru-Ministru no Ministru Planu no Ordenamentu, José Maria dos Reis, hateten, dezastre naturál ne’ebé akontese, loke oportunidade ba Governu atubele aselera prosesu planu ordenamentu territóriu.

“Bainhira buat hotu akontese, hanesan oportunidade ba Governu atubele avansa lalais planu ordenamentu tanba tinan 20 ona laiha planu ordenamentu nasionál, laiha planu munisipál, no urbanu. Daudaun iha hela faze estudu no Ministériu Planu no Ordenamentu (MPO) haree hosi anglu ida-ne’e tenke aselera lalais,” Ministru relata hafoin reuniaun Konsellu Administrasaun Fundu Infraestrutura (KAFI) iha salaun Ministériu Finansa, Aitarak-laran, segunda ne’e.

Notísia relevante: SEPS distribui nesesidade bázika ba vítima dezastre naturál iha Tasi-Tolu

Aleinde ne’e, MPO iha ona ezbosu lei tolu ne’ebé importante tebes tanba hanesan baze ba ordenamentu inklui fó dalan Governu atu bandu ema hela iha foho, mota ninin, no tasi ninin.

Governante ne’e dehan, ekipa téknika ne’ebé estabelese iha MPO realiza ona reuniaun hodi define fatin risku, tanba foin lalais Konsellu Ministru mós aprova deklarasaun situasaun kalamidade, ne’ebé iha artigu 4 proibidu populasaun atu filafali ba sira-nia hela fatin ne’ebé konsidera hanesan zona risku.

MPO koordena ona ho instituisaun relevante hanesan Sekretaria Estadu Ambiente (SEA), Sekretaria Estadu Protesaun Sivíl (SEPS), Institutu Petróleu no Jeolojia (IPG), no Ministériu Administrasaun Estatál (MAE) atu define fatin risku sira.

“Populasaun ne’ebé antes hela iha fatin risku labele filafali ba sira-nia hela fatin, tanba ne’e tenke iha solusaun, ne’ebé tenke buka rai hodi halo fatin ba populasaun sira hela,” nia hatutan.

Ekipa mós diskute ona tanba populasaun sira labele hela kleur demais iha sentru evakuasaun.

“Ezemplu hanesan komunidade ne’ebé antes ne’e hela iha Tasi-Tolu, sira labele fila entaun tenke buka lalais alternativa. Fatin ne’ebá (Lagoa Tasi-Tolu) ita haree ema hela iha bee-laran, tanba ne’e maka Governu esforsu buka rai no iha tempu badak tenke iha ona espasu ida atu halo fatin ba sira hela provizóriamente, hafoin harii definitiva,” nia subliña.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here