Prezidente Konsellu Administrasaun EDTL,EP, Paulo da Silva. Imajen TATOLI/Egas Cristovão

DILI, 19 abríl 2021 (TATOLI)—Timor Gás no Petróleu, Empreza Públika (Timor GAP, E.P) hamutuk ho Eletricidade de Timor-Leste, Empreza Públika (EDTL,E.P) asina ona akordu fornese kombustível ba sentál elétrika Betano, tanba ne’e tempu badak sei hahú fornese.

“Ita ho Timor GAP konklui ona akordu asina kontratu atu fornese mina ba sentrál elétrika Betano, ne’ebé semana rua tan (fulan oin) hanesan ne’e sei deskarga mina tuir kontratu,” Prezidente Konsellu Administrasaun Eletricidade de Timor-Leste, Empreza Públika (EDTL,E.P), Paulo da Silva, informa ba Agência TATOLI, iha edifísiu Ministériu Finansa, Aitarak laran, segunda ne’e.

Notísia relevante: EDTL-Timor GAP selebra akordu fornese kombustível iha sentrál elétrika Betano

Resposável ne’e dehan, hafoin parte rua asina akordu mak foin hetan vistu préviu hosi Tribunal das Contas, atu hahú fornese mina ba sentrál elétrika.

Timor GAP sei fornese iha faze tolu, ne’ebé iha faze dahuluk sei fornese litru 10.000 no kontinua to’o fornese ba períodu tinan rua resin.

“Ita haree iha dokumentu ne’e sei fornese durante tinan rua ho kustu orsamentu millaun $50-resin,” nia akresenta.

Prezidente ne’e nota katak, daudaun ne’e Timor GAP seidauk iha armazen, maibé EDTL nia armazen iha Hera no Betano bele akomoda.

“Ba ita importante mak sira lori mina ba Betano atu deskarga ba tanke EDTL hodi fornese ba sentrál elétrika Betano,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here