Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 19 abríl 2021 (TATOLI)—Inundasaun ne’ebé akontese iha domingu (04/04) konsege estraga infraestrutura eletrisidade iha lokál hamutuk 31, ne’ebé maioria media tensaun no liña distribuisaun, maibé maioria rekupera ona.

“Ita haree ai-rin barak tohar no mota lori inklui rai taka fiu no ekipamentu seluk,  ne’ebé hosi lokál 31 ne’ebé hetan impaktu dezastre naturál, ita rekupera ona iha lokál 28 (korresponde 90%) no falta fatin tolu mak seidauk tanba estragu maka’as,” Prezidente Konsellu Administrasaun Eletricidade de Timor-Leste, Empreza Públika (EDTL,E.P), Paulo da Silva, hateten iha edifísiu Ministériu Finansa, Aitarak-laran, segunda ne’e.

Resposável ne’e informa, lokál tolu ne’ebé seidauk rekupera mak iha área Loes-Liquiçá, Kasnafar-Beduku, Dili no Hera, maibé daudaun ne’e ekipa sira iha terrenu atu halo rekuperasaun.

“Ohin ekipa tékniku mobiliza ona ekipamentu atu halo rekuperasaun no iha Kasnafar-Beduku horisehik rekupera ona, ne’ebé hela de’it mota sorin inklui Hera, maibé semana ida ne’e bele rezolve hotu,” nia akresenta.

Notísia relevante: EDTL hahú mobiliza materiál rekupera eletrisidade iha Loes

Prezidente empreza estatál ne’e dehan, kustu estimativa ba estragu infraestrutura eletrisidade purvolta $260.000.

“Ita uza ona materiál iha armazen ba nesesidade manutensaun normál, tanba ne’e bele rekupera liña distribuisaun sira,” nia hatutan.

Maski nune’e, dezastre naturál foin lalais la afeta ba sentru elétrika Hera no Betanu, maibé iha liña transmisaun alta tensaun, iha torre 16 mak amesadu.

“Ita rekorre ba Fundu Infraestrutura tanba EDTL laiha kondisaun finanseiru atu haree ba kestaun ne’e,” nia subliña.

Nune’e, EDTL halo ona levantamentu tékniku sira hodi  prepara  hela dezeñu  no Bill of Quantity (BoQ), nune’e semana ida tan bele finaliza hodi rekorre ba Fundu Infraestutura halo rekuperasaun infraestrutura.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here