Prezidente CVTL, Madalena Hanjam. Imajen Tatoli/dok.

DILI, 19 abríl 2021 (TATOLI)- Dezastre naturál iha loron 04 abríl, foin lalais ne’e, lori taterus   ba komunidade kapitál Dili, inklui mós abitante balun iha Munisípiu Baucau, Ainaro, Manatuto, Viqueque, Aileu ho Covalima.

Dezastre ne’e mós halo ba populasaun iha Indonézia sofre no tuir autoridade iha Indonézia parte Leste nian no Timor-Leste nia haree katak dezastre naturál ne’e halakon ona maizumenus abitante 200-resin nia vida.

Notísia Relevante : CVTL oferese nesesidade bázika ba vítima inundasaun iha Tibar

Entretantu dadus ofisiál hosi parte Governu Timor-Leste nian, liuhosi Sekretaria Estadu Protesaun Sivíl (SEPS) no Ministériu Administrasaun Estatál (MAE), hatudu katak iha família 25.000-resin mak hetan impaktu hosi dezastre naturál no hela fatin 4.546 mak aat.

To’o 14 abríl, iha Dili ema na’in-11.104 mak hela iha sentru evakuasaun ativu hamutuk 38, hosi família hamutuk 8.548 ne’ebé afetadu hosi inundasaun. Nune’e mós iha nivel infraestrutura públika-sira, iha estrada hamutuk 22 no ponte 11 mak hetan estragu.

SEPS rejista mós ema na’in-35 mak lakon vida durante dezastre naturál, hosi númeru ne’e na’in-10 mak seidauk hetan.

Hosi na’in-35 ne’e, na’in-20 iha Dili, Ainaro na’in-neen, Viqueque na’in-tolu, Covalima na’in-rua, Manatuto na’in-rua, Aileu na’in-ida no Baucau na’in-ida.

Situasaun pandemia COVID-19 ho regra distánsia sosiál no distánsia fíziku  sai dezafiu boot iha fatin-sira sentru  evakuasaun nian, tanba ne’e Cruz Vermella Timor-Leste (CVTL) haree hanesan susar tebes atu luta entre liberta povu hosi dezastre naturál ka luta atu povu labele nakda’et peste letál COVID-19 ne’e.

Prezidente CVTL, Madalena da Costa Hanjam, liuhosi  komunikadu imprensa ne’ebé Agência Tatoli asesu, segunda ne’e, hosi CVTL hateten medida urjente nesesáriu-sira presiza aplika hodi prevene surtu COVID-19, au-mézmu tempu hasoru dezastre rai halai no inundasaun halo Timor-Leste enfrenta situasaun ne’ebé diferente, tuir númeru ofisiál, kazu foun multiplika  maizumenus 100 besik atinje ona kazu 1.000 iha fulan kotuk fó ameasa ba sistema saúde Timor-Leste ne’ebé frajil. Tanba abitante 33.000-resin mak afetadu diretamente hosi inundasaun no rai monu. Autoridade deskreve akontesimentu ne’e hanesan dezastre ho impaktu ne’ebé boot liu iha tinan 40 nia laran.

“Ita nia laran susar, haree komunidade hili ba fatin seguru temporáriu atu salva vida, iha asesu ba ai-han no bee ka hasees-an hosi infesaun virus COVID-19 ne’ebé bele hamate sira, voluntáriu CVTL sira hetan ona treinamentu espesífiku no aplika protokolu sira ho rigorozu atu evita COVID-19 bele espalla. Ita hadau-malu ho tempu. Komunidade hela kleur liu-tan iha fatin seguru temporáriu sira, risku atu akontese surtu boot aas liu-tan,”  Madalena da Costa Hanjam hateten.

Ekipa salva vida CVTL no Indonézia buka ona sobrevivente sira no evakua ba fatin seguru distribui ajudu sira hanesan ai-han, manta, terpal, roupa, no sasán ijiene pesoál sira. Esforsu sira boot liu mak fornesimentu bee-moos ba hemu no nesesidade ijiene hodi prevene moras. Tanba Indonézia mak nasaun númeru daruak iha Ázia, rejista kazu liu 1.5 millaun kazu COVID-19 no akontese númeru infesaun 4.000-resin loroloron.

Sekretáriu Jerál Krús Vermella Indonézia, Sudirman Said, hateten katak, lakon vida ne’e trajédia ida no akontese ba família ne’ebé susar no kolen ona durante pandemia COVID-19.

“Ami nia ekipa halo esforsu no servisu kualkér-oras hodi buka sobrevivente, fornese ai-han esensiál sira, bee-moos, no ajuda materiál seluk hodi asegura sira nia vida,” nia hateten.

Xefe Delegasaun Federação Internacional das Sociedades da Cruz Vermelha e do Crescente Vermelho (IFRC) ba Indonézia no Timor-Leste, Jan Gefland, hateten COVID-19 halo fraku liu-tan sistema Saúde iha Indonézia no Timor-Leste, tanba Surtu COVID-19 iha mós moras seluk ne’ebé bele halakon ema nia vida hanesan kólera, dizenteria, no dengue bele lori ba situasaun difisil liu tan.

Iha nasaun seluk, bee-moos, sabaun no máskara hanesan sasán sira fasil loos atu asesu, maibé COVID-19 hanorin; sira mak salva ema barak nia vida. Esforsu maka’as tenke halo atu ema barak bele iha asesu ba materiál sira ne’e atu sira bele hetan protesaun no moris nafatin hosi surtu ida-ne’ e.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here