Traballadór timor-oan sira baihira halo check-in iha Aeroportu Comoro molok atu dezloka ba Austrália, kuarta (2/12). Imajen TATOLI/António Gonçalves

DILI, 19 abríl 2021 (TATOLI)Autoridade Aviasaun Sivíl Timor-Leste (AACTL, sigla portugés) halo lansamentu ba kestaun tolu importante hodi mellora no fasilita servisu di’ak liután ba oin.

“Ohin ne’e lansamentu programa tolu ne’ebé importante hanesan website ofisiál AACTL, sistema jestaun no aprovasaun voo no ikus liu maka email ofisiál AACTL,” Ministru Transporte no Komunikasaun, José Agostinho da Silva, informa hafoin seremónia lansamentu, iha edifísiu Ministériu Transporte no Komunikasaun, Caicoli, segunda ne’e.

Governante ne’e konsidera, lansamentu ne’e importante tanba bele fasilita AACTL no parseiru sira bele aselera prosesu atendimentu, tanba aviaun sivíl nia papél importante atu regulariza movimentu aviaun hosi rai-li’ur mai rai-laran, ne’ebé halo aprovasaun voo.

“Bainhira autoridade aviasaun sivíl hasai flight approval ka autorizasaun aterrajen, liuhosi regra ne’e maka rigorozu no kuidadu tebes tanba sensitivu,” nia akresenta.

Lansamentu ne’e atu dijitaliza servisu iha setór aviasaun inklui email ofisiál autoridade aviasaun sivíl, tanba durante ne’e bainhira atu manda karta elektóniku uza de’it gmail.

Enkuantu, ba flight approval management system, importante tebes atu hatene aviaun hira mak tama no aviaun hirak mak sai fali ba li’ur.

“Nune’e mós, bele hatene tula pasajeiru hira, sasán kuantidade hira, aviaun ne’e tipu saida, mai hosi nasaun ne’ebé. Dadus hotu sei mai hodi sistema ne’e,” nia hatutan.

Tanba ne’e, atu servisu lalais, tuir Ministru tenke dijitaliza sistema, atu nune’e públiku bele asesu no hafasil servisu aviasaun no evita risku.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here