Aviaun Malindo ne’ebé tula Timoroan na’in 73 to’o ona aeroportu internasionál Nicolau Lobato Dili, domingu (18/04/21). Imajen Tatoli/Evaristo Soares Martins.

DILI, 18 abríl 2021 (TATOLI)—Timoroan na’in 73 to’o ona aeroportu internasionál Nicolau Lobato Dili, iha tuku 08.00, ho aviaun Malindo. Timoroan hirak-ne’e mai hosi Koreia Súl, Inglaterra, Portugál no Indonézia.

Reprezentante Ajénsia Viajen, Pedro Carrascalão, hateten ekipa ne’ebé fasilita Timoroan na’in 73 ne’e kompostu hosi timoroan hotu ne’ebé oras ne’e dezenvolve hela setór aéro-nian.

Notísia relevante:Pedro Carrascalão obedese desizaun Governu, muda voo umanitária ba maiu

Nia kongratula esforsu hosi Ministériu Negósiu Estranjeiru no Kooperasaun (MNEK) no Embaixada Timor-Leste nian iha Malázia, ne’ebé inklui Timor-oan hirak-ne’e iha vó dahuluk aviaun Malindo.

Pedro Carrascalão rekoñese akontesimentu iha 16 abríl, la’ós erru aviaun-nian, maibé erru hosi parte kompañia Aero Dili no oras ne’e rezolvidu.

“Ohin tama ne’e hamutuk 73 maioria mane inklui Timoroan ida sai hosi Timor-Leste ho aviaun Citilink iha 30 marsu atu ba Koreia Súl, maibé tanba nia pasaporte válidu de’it ba fulan-ualu entaun nia detidu iha Malázia,” Pedro Carrascalão informa ba jornalista-sira, iha aeroportu Comoro, domingu ne’e.

Nia haktuir, imigrasaun Malázia dehan 16 abríl Timoroan ne’e tenke sai, bainhira la sai entaun  tama kuarentena iha-ne’ebá hodi hein aviaun ida atu deporta fali mai TL.

“Tanba ne’e mak ita erforsu ho aviaun ne’e mai, nune’e alin ne’e labele hasoru situasaun difísil,” nia subliña.

Informasaun ne’ebé Pedro Carrascalão hetan katak, Timoroan na’in 73 hakarak fila tanba sira-nia família sofre ba inundasaun, serka sanitária no banku-sira taka hotu.

“Entaun, sira foti desizaun fila mai Timór hodi ajuda sira-nia família,” nia haktuir.

Tuir loloos, nia dehan, iha sidadaun estranjeiru na’in-ida atu tama mai TL, hodi sai asesór ba Governu, maibé momentu atu sai hosi Londres, seidauk iha aprovasaun vó.

“Entaun hosi ami rasik katak, di’akliu ita boot lalika mai tanba ema estranjeiru, ne’e Governu Timor la tau-matan ba ita boot, nia mós ta’uk katak, nia to’o Malázia bele deporta fila ba nia rain,” nia konta tuir.

Nune’e mós Diretór Aero Dili, Lourenço de Oliveira, hateten vó dahuluk aviaun Malindo mai TL tanba hetan aprovasaun vó hosi Ministériu Negósiu Estranjeiru no Kooperasaun (MNEK), Ministériu Transporte no Komunikasaun (MTK) no Sentru Integradu Jestaun Krize (SIJK).

“Ami husu ba Governu, dehan bele fó de’it ba embaixada-sira no mós parte Governu-nian, ne’e mak ohin rezultadu Timoroan na’in 73 to’o ona iha Timor, maske iha 16 abríl mosu erru balun,” nia dehan.

Tuir obervasaun Agência Tatoli, hafoin Timoroan hirak ne’e sai hosi aeroportu Nicolau Lobato, ekipa vilijánsia saúde-nian tula kedan ba kuarentena ne’ebé Governu kontrata ona.

Tuir planu, loloos ne’e ohin aviaun Malindo fila ba Malázia tula ema hamutuk 104, maibé tanba balun la halo teste swab, entaun tula de’it na’in 90. Hosi na’in 90 ne’e kompostu hosi Timoroan na’in 10 no ema estranjeiru na’in 80.

Jornalista: Evaristo Soares Martins

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here