Kondisaun Eskola Ensinu Báziku Filiál (EBF), Casnafar, Manleuana, Dili. Imajen Tatoli/Tomé Amado.

DILI, 18 abríl 2021 (TATOLI)—Ministru Edukasaun Joventude no Desportu (MEJD), Armindo Maia, sei komunika ho Ministru Obra Públika (MOP), Salvadór Soares dos Reis Pires, atu buka solusaun lalais ba kondisaun atuál edifísiu eskola Ensinu Báziku Filiál (EBF), Casnafar, Manleuana, Dili.

“Ha’u hakfodak ho kondisaun eskola ne’e. Ha’u haree tiha kondisaun eskola ne’e, hamosu kedan reasaun atu komunika lalais ho MOP, oinsá bele buka alternativa ruma kona-bá destinu eskola ne’e,” Ministru Armindo Maia hateten ba jornalista-sira iha eskola Casnafar, domingu ne’e.

Notísia relevante:Posibilidade MEJD sei konstrui edifísiu EBF Casnafar iha fatin seluk

Iha observasaun, Ministru haree katak, eskola ne’e sai tiha ona mota dalan ne’ebé sei lori perigu tebtebes ba profesór-sira liuliu alunu-sira.

“Ami rona katak, MOP rasik mai haree ona kondisaun eskola ne’e. Entaun, ami presija koordena fali atu hatene loloos sira-nia intervensaun,” nia subliña.

Dadus MEJD atu halo konstrusaun no reabilitasaun ba edifísiu eskola iha Munisípiu Dili iha 2021, inklui eskola EBF Casnafar no Eskola Ensinu Sekundáriu Teknika Vokasionál (TEKVOK) Hera.

“Atu realiza konstrusaun ne’e presija halo levantamentu didi’ak nune’e haree eskola ne’ebé tama iha kategoria emerjénsia,” nia subliña.

Tuir dadus MEJD, eskola-sira ne’ebé tama iha kategoria emerjénsia hafoin dezastre naturál iha 04 abríl, iha eskola 27.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here