Apoiu solidariedade ne’ebé preparadu iha Peterborough atu haruka mai TL. Imajen/Celso Oliveira.

DILI, 18 abríl 2021 (TATOLI)—Komunidade Timoroan ne’ebé hela iha sidade Peterborough no Thrapston, Reinu Unidu, hala’o asaun solidariedade koletiva, hodi fó apoiu umanitáriu ba povu Timor-Leste (TL), ne’ebé hetan dezastre naturál iha domingu 04 abríl. Tuir planu, apoiu solidariedade ne’e sei to’o TL iha inísiu fulan juñu.

“Hanesan Timoroan la’o-rai sempre fó solidariedade ba povu no rai ida-ne’e ne’ebé oras ne’e hetan susar. Ita hotu la espera dezastre naturál ne’e mosu iha TL. Maibe, importante mak ita nu’udár Timoroan kontinua lolo-liman ba malu hodi tulun malu iha tempu difísil ne’e,” Prezidente komunidade Timoroan iha Peterborough, Celso Oliveira, hateten ba Agência Tatoli via WhatsApp, domingu ne’e.

Notísia relevante:SEPS-MAE halo levantamentu ba uma estragu tanba inundasaun

Celso Oliveira lori komunidade Timoroan iha Peterborough, hakarak hato’o sentidu solidariedade, korájen no forsa ba Timoroan-sira ne’ebé lakon família no lakon sasan iha dezastre naturál ne’e.

Alende ne’e, hato’o obrigadu-wain ba Timoroan, belun-sira hosi Reinu Unidu no fatin hotu ne’ebé fó ona kontribuisaun hanesan sasán no osan, fó sira-nia tempu ho voluntariamente atu organiza-malu, nune’e realiza asaun solidariedade ida-ne’e ba TL ne’ebé distánsia dook tebes hosi Reinu Unidu.

“Ha’u hein katak, talin solidariedade ne’e kontinua lakan nafatin iha futuru,” Celso Oliveira subliña.

Apoiu solidariedade ne’e mak hanesan roupa, manta, brinkedu, bisikleta, sasan dapur-nian, ai-han no seluk-seluk-tan sei haruka tuir kontainér ne’ebé oferese gratuita hosi kompañia Timoroan naran Maumeta Logistic.

Sasán sira-ne’e hanesan aktu solidariedade hosi Timoroan ne’ebé hela iha Peterborough,  Thrapston no mós hosi belun Portugueza-sira, Lithuanian, Xineza, autoridade lokál Peterborough, Families First, Morrison, Youth Inspired, PARCA, PCVS no seluk tan.

Tuir planu, sasan sira-ne’e sei to’o iha TL iha inísiu fulan Juñu no sei entrega ba Institutu Canosiano-Dili, hodi fahe tutan ba populasaun ne’ebé afetadu hosi dezastre naturál. 

Dadús ofisiál hosi Governu TL liu hosi Sekretáriu Estadu Protesaun Sivíl (SEPS) no Ministériu Administrasaun Estatál (MAE), iha família 25.000-resin mak sofre ba dezastre naturál no hela fatin 4.546 mak estragadu.

To’o 14 abríl, iha Dili ema na’in 11.104 mak hela iha sentru evakuasaun ativu hamutuk 38, hosi família hamutuk 8.548 ne’ebé afetadu hosi inundasaun.

Nune’e mós iha nível infraetrutura públika-sira, iha estrada hamutuk 22 no ponte 11 mak hetan estragu.

SEPS rejista mós ema na’in 35 mak lakon-vida durante dezastre naturál, hosi númeru ne’e na’in-10 mak seida’uk hetan.

Hosi na’in-35 ne’e, na’in-20 iha Dili, Ainaro na’in-neen, Viqueque na’in-tolu, Covalima na’in-rua, Manatuto na’in-rua, Aileu na’in-ida no Baucau na’in-ida.

Notísia relevante:SEPS distribui ona apoiu emerjénsia ba família 2.000 iha Dili

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here