Plenária Parlamentu Nasionál. Imajen Tatoli/António Gonçalves.

DILI, 18 abríl 2021 (TATOLI) —Komisaun C ne’ebé trata asuntu Finansa Públika, sei aprova relatóriu no paresér kona-bá Orsamentu Retifikativu (OR), liuhosi alterasaun Lei Orsamentu Jerál Estadu (OJE) 2021, iha segunda (19/04/21).

“Tuir kalendáriu, aban dadeersan Komisaun C aprova relatóriu no paresér, lokraik kontinua ba debate iha plenária, maibé depende ba finalizasaun relatóriu no paresér ne’e,” Prezidente Komisaun C, Deputada Maria Angélica Rangel, informa ba jornalista Agência Tatoli, liuhosi telefónika, domingu ne’e.

Notísia relevante:PN deside Orsamentu Retifikativu debate ho karáter urjénsia

Prezidente Komisaun C ne’e reforsa katak, bainhira laiha mudansa ruma, entaun PN debate kedan altersaun OJE 2021 ne’e iha plenária.

VIII Governu Konstitusionál submete proposta-alterasaun ba Lei OJE ne’e ho karáter urjénsia iha 30 marsu 2021, no termina ona faze audiénsia públika ho ministériu relevante, oras ne’e hein kontinua iha faze jeneralidade.

Iha proposta-alterasaun ba Lei OJE ne’e, Governu propoin orsamentu ho montante millaun $223,8 hodi responde ba pandemia COVID-19. Hosi montante millaun $223 ne’e foti hosi Fundu Infraestrutura millaun $60 no resta halo de’it ajustamentu ba orsamentu 2021, ne’ebé aprovadu no promulgadu.

Entretantu Orsamentu Jerál Estadu (OJE) 2021 ne’ebé Parlamentu Nasionál aprova no Prezidente Repúblika promulga hamutuk billiaun $1.895 kompostu hosi saláriu no vensimentu millaun $239,26, bens (sasán) no serbisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.

Hosi montante orsamentu billiaun $1.895, hahú hosi janeiru to’o iha domingu fulan-abríl 2021 persentajen ezekuasaun atinje $23.7%.

Notísia relevante:Governu aprezenta Orsamentu Retifikativu millaun $223 ba PN

Jornalista: Evaristo Soares Martins

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here