Primeiru-Ministru, Taur Matan Ruak, no komitiva observa servisu normalizaun infraestrutura iha Beduku to’o Kasnafa, sábadu (17/04). Imajen/MOP

DILI, 17 abríl 2021 (TATOLI)—Primeiru-Ministru (PM), Taur Matan Ruak, hamutuk ho Ministru Obra Públika, Salvador Eugênio Soares dos Reis Pires, Prezidente Bee Timor-Leste, Empreza Públika (BTL,E.P), Carlos Peloi dos Reis, Prezidente Eletrisidade de Timor-Leste, Empreza Públika (EDTL,E.P), Paulo da Silva, observa infraestutura públika ne’ebé hetan estragu tanba dezastre naturál.

Entidade hirak ne’e haree ba servisu normalizasaun infraestrutura hanesan estrada, bee-moos no eletrisidade iha área Beduku to’o Kasnafa, inklui observa estrada dirasaun Beduku to’o Sarlala ne’ebé liga kapitál Dili bá munisípiu Aileu, ne’ebé daudaun normaliza hikas ona hodi fasilita movimentu transporte públiku no privadu.

Hafoin halo observasaun, PM nota katak inundasaun sobu infraestrutura barak no difikulta movimentasaun públiku inklui situasaun eletrisidade no bee-moos barak mak a’at.

“Ami mai haree normalizasaun estrada ligasaun Dili bá Aileu, prátikamente udan sobu fatin barak no halo ligasaun entre munisípiu mai Dili susar loos. Seluk mak situasaun eletrisidade estraga barak, liu-liu infraestutura hanesan torre perigu loos tanba bele monu,” Xefe Governu dehan iha Kasnafa, hanesan haktuir iha nota ne’ebé Agência TATOLI asesu, sábadu ne’e.

PM ho ekipa mós nota katak rai monu maka’as inklui infraestutura distribuisaun bee mós a’at hotu.

“Kanu-boot ne’ebé lori bee bá sidade Dili kotu, entaun ita tenke halo atendimentu emerjénsia ba ita-nia sidadaun sira hodi rekupera filafali, nune’e bee-moos bele nesesáriu ba populasaun,” nia akresenta.

Iha fatin hanesan, Ministru Salvador hateten, Ministru Obra Públika (MOP) mobiliza ona  ekipamentu pezadu hosi Institutu Jestaun Ekipamentu (IGE, sigla portugés) no setór privadu hodi normaliza hikas fatin ne’ebé hetan impaktu dezastre naturál.

Tuir Ministru ekipa sira serbisu normaliza mota, hasai sedimentasaun no tahu inklui halo limpeza drenajen sira.

Aleinde ne’e, ekipa sira hahú hasai sedimentasaun iha mota prinsipál ne’ebé bee sulin ho kuantidade boot hanesan Maloa, Becora, Bekusi no fatin seluk tan.

Iha kompañia hamutuk 20-resin mak daudaun ajuda servisu IGE iha terrenu normaliza fatin hetan impaktu maka’as inundasaun.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here