Ministru Edukasaun Juventude no Desportu (MEJD), Armindo Maia, ho nia ekipa vizita vítima dezastre naturál ne’ebé hala iha Eskola Tékníku Vokasionál Hera. Imajen/Espesiál.

DILI, 17 abríl 2021 (TATOLI)–Ministériu Edukasaun Juventude no Desportu (MEJD) ho nia ekipa ne’ebé kompostu hosi Gabinete Ministru, Vice-Ministru inklui Embaxadór Portugál, UNHCR no UNICEF, kntinua hala’o vizita no oferese apoiu umanitária ba vitíma dezastre naturál hamutuk 221 ne’ebé oras ne’e refujia iha sentru evakuasaun Eskola Tékníku Vokasionál Hera no Eskola Ensinu Báziku Filiál Númeru 5 Comoro.

Notísia Relevante: MEJD-UNICEF fó apoiu umanitária ba vítima dezastre naturál hamutuk 1.809

“Ami mai atu hamutuk ho imi, fó korajen ba imi atu labele sente todan liu. Ami lori sasán uitoan ba imi. Maske la barak maibe ida-ne’e mak ami bele. Apoiu umanitária ne’ebé ami fó mak hanesan kulxaun, foos, mina tein, taxu, masin, masin-midar inklui brinkeirus no kadernu ba labarik sira ne’e, nu’udar asaun solidaridade ida,” Ministru Edukasaun Juventude no Desportu (MEJD), Armindo Maia, dehan ba vitima sira-ne’ebé hela iha Eskola Tékníku Vokasionál Hera, sábadu ne’e.

Governante ne’e hateten, akontesimentu dezastre naturál ne’e la’ós akontese de’it iha Hera maibé kuaze iha Dili laran, ne’ebé lori família barak mak afetadu ba inundasaun maske balun iha kondisaun grave maibé la grave liu kondisaun Hera nian no balun hetan estragu kmaan.

“Ita hotu nu’udar vitíma iha dazastre naturál ne’e. Balun hetan estragu totál no balun la grave hanesan ita-boot sira-nian. Tanba, ita hotu sai vitíma, ne’eduni ha’u ho ekipa tomak mai lolo netik buat uitoan ba imi iha tempu ne’ebé presiza,” nia dehan.

Imajen/Espesiál.

Iha fatin hanesan, Embaixadór Portugál Jose Pedro Machado Vieira fó korajen ba vitíma sira katak Timor-Leste no Portgál nu’udar amigu di’ak iha tempu defisil no iha tempu di’ak amigo nafatin. Governu Portugál nunka taka matan ba Timor tanba bainhira Portugál rona povu Timor hasoru dezastre naturál ne’ebé hamosou inundasaun, Portugál fó kedan ninia apoiu.

Povu no Governu Portugál husu ba timor-oan sira iha kampu refujiadu no sira-ne’ebé hela iha uma atu nafatin fó liman ba malu, hodi tulun malu atu situasaun ne’ebé ohin loron akontese iha Timor bele lalais hetan ninia solusaun.

“Fiar katak Timor sei ultrapasa no sei dezenvolve fila-fali ninia rain hosi akontesimentu dezastre naturál ne’ebé estraga sasán no halakon mós ema-nia vida iha loron 04 abríl liu-bá ne’e,” nia dehan.

Vitima dezastre naturál ne’ebé daudaun ne’e hela iha Eskola Tékníku Vokasionál Hera hamutuk 103 hosi uma kain 36 no Eskola Ensinu Báziku Filiál Númeru 5 Comoro hamutuk 118 hosi uma kain 29.

Jornalista: Tome Amado

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here