Xefe Estadu Maiór Jenerál F-FDTL, Tenente Jenerál, Lere Anan Timur, konversa ho líder nasionál Kay Rala Xanana Gusmão iha Lagoa Tasi-tolu, sesta (16/04/21). Imajen Tatoli/Eugénio Pereira.

DILI, 16 abríl 2021 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál, Lere Anan Timur, ba haree direta líder nasionál Kay Rala Xanana Gusmão ne’ebé ho ekipa tékniku-sira, esforsu hodi supa bee iha Lagoa Tasi-tolu hodi salva populasaun iha área ne’e, hafoin inundasaun iha 04 abríl, tinan ne’e.

Lere Anan Timur, to’o iha Lagoa Tasi-tolu iha oras 15:00, akompaña direta ekipa tékniku-sira ho Xanana Gusmão hodi monta mangeira atu supa bee, ne’ebé to’o oras ne’e seidauk menus.

Notísia relevante:Negosiasaun Lere ho Xanana seidauk iha rezultadu

Lere rekoñese esforsu Xanana-nian, ba serbisu ida-ne’e tanba nia haree katak, atu asesu to’o povu-nia hela fatin presija bero.

“Agradese ba maun Xanana nia esforsu, hodi supa bee atu salva ita-nia povu,” Lere hateten iha Tasi-tolu, sesta ne’e.

Iha hasoru-malu ne’e mós, Lere introdús kona-bá misaun serbisu F-FDTL-nian ne’ebé harii karreta kazerna mobile rua, hodi tein hahán kada loron ho kuantidade 1.000, atu fahe ba populasaun ne’ebé refujia iha Kapela São João Paulo II, Tasi-tolu.

Tuir planu, sábadu (17/04) Komandu F-FDTL sei hala’o serimónia retira ba programa ida-ne’e, ne’ebé sei entrega hikas ba Governu Timor-Leste (TL) liu hosi Sekretáriu Estadu Protesaun Sivíl (SEPS).

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here