Xefe Estadu Maiór Jenerál F-FDTL, Tenente Jenerál, Lere Anan Timur, konversa ho líder nasionál Kay Rala Xanana Gusmão, iha sentru izolamentu Vera Cruz, (13/04/21). Imajen Tatoli/António Gonçalves.

DILI, 16 abríl 2021 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál, Lere Anan Timur hateten, nia hadomi Kay Rala Xanana Gusmão, tanba ne’e  husu líder sira atu hametin unidade hodi harii pás iha rai ne’e.

“Ita-nia matebian sira-tanis, ha’u ba vizita ha’u-nia maun Xanana iha Vera Cruz, la’ós ha’u ba hanesan Tanente Jenerál. Ha’u ba hanesan nia-alin, tanba ha’u hadomi nia. Ha’u hanoin barak, tanba uluk ami na’in-rua han iha bikan ida, ami toba iha ai-tahan ida, ami toba iha ai-hun ida-nia okos. Kuandu nia toba fali iha ne’ebá, ha’u dehan nusá mak maun mai toba fali iha loron laran hanesan ne’e,” Lere hateten ba jornalista-sira, iha Kuartél Jenerál F-FDTL, Fatuhada, Dili, sesta ne’e.

Notísia relevante:Negosiasaun Lere ho Xanana seidauk iha rezultadu

Lere sente preokupadu ho asaun Xanana-nian ne’ebé sai problema komplikadu-ida, nune’e ho inisiativa-rasik ba ko’alia nu’udár ninia-komandante, hodi buka solusaun tuir ezizénsia ne’ebé iha.

“Kuandu maun Xanana monu iha situasaun ida hanesan ne’e, moralmente ha’u dehan la di’ak. Ita rerus ona iha ai-laran, bá tan kadeia tinan-hitu, agora mai fali iha Vera Cruz. Líder sira mak tenke kompreende-malu, liu-liu Primeiru-Ministru no Prezidente Repúblika,” Lere subliña.

Tenente Jenerál ne’e mós dehan, bainhira líder Timoroan-sira dame-malu mak sei fó valór ba erói hirak ne’ebé oferese an ba rai ida-ne’e.

“Xanana ne’e ita-nia maun, maun ne’e ita nunka nega, tanba sai ona kultura ida. Husu líder polítiku-sira atu fó-liman ba malu hodi hametin unidade, kontribui ba harii Estadu no Nasaun,” nia husu.

Entretantu, iha 13 abríl tinan ne’e, Lere Anan Timur, hakat ba haree direta  Xanana, bainhira hamutuk ho família matebian Armindo Borges ne’ebé mate ho COVID-19 iha sentru izolamentu Vera Cruz, ezize ba Governu atu bele entrega mate-isin ba família hodi haloot tuir kultura Timór-nian.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here