Primeiru-Ministru, Taur Matan Ruak, no komitiva observa servisu normalizaun infraestrutura iha Beduku to’o Kasnafa, sábadu (17/04). Imajen/MOP

DILI, 17 abríl 2021 (TATOLI)—Inundasaun ne’ebé akontese iha domingu (04/04) lori impaktu maka’as ba territóriu tomak, liu-liu kapitál Dili ne’ebé mak hetan impaktu maka’as, tanba ne’e Governu forma ona ekipa rua hanesan grupu traballu liña ministeriál hodi haree ba aspetu umanitária no infraestrutura.

“Ita-nia ekipa agora halo identifikasaun purvolta sítiu 52 mak hetan estragu, ne’ebé fahe ba sesaun estrada 22, ponte ualu, no restu ne’e moru protesaun 20-resin. Ha’u informa ona iha Parlamentu Nasionál, totál estragu provizóriu hamutuk millaun $225 no horiseik tama fali totál estragu infraestrutura ezistente millaun $160, maibé bainhira atu halo rekuperasaun presiza millaun $245,” Ministru Obra Públika, Salvador Eugênio Soares dos Reis Pires hateten iha Kasnafa, hanesan haktuir iha nota ne’ebé Agência TATOLI asesu, sábadu ne’e.

Governante ne’e dehan, dadus ne’ebé iha hanesan provizóriu no ekipa traballu kontinua kuantifikasaun infraestutura públika hodi halo rekuperasaun, rekonstrusaun no planifikasaun detalladu ba estimasaun kustu estragu iha kapitál Dili no iha munisípiu sira.

Kona-ba liña eletrisidade, iha fatin 29 mak hetan estragu maibé konsege rekupera ona 23 no neen mak seidauk.

“Beduku nia komesa halo atendimentu ona no konsege fornese enerjia eletrisidade ba mota sorin, maibé mota sorin mak seidauk no kontinua halo rekuperasaun, restu  ekipa Eletrisidade de Timor-Leste (EDTL) halo hela normalizasaun ba infraestrutura distribuisaun ne’ebé hetan estragu,” Ministru hatutan.

Nune’e mós, kona-ba bee-moos iha Dili, estasaun perfurasaun 26 mak kuaze hetan estragu hotu maibé Bee Timor-Leste (BTL) konsege normaliza no kanaliza hosi mota sira hanesan Bena-Mauk no bee-moos Manleu.

Notísia relevante: BTL, E.P hadi’a hotu ona sistema bomba bee 26 ne’ebé hetan estragu

“Iha Comoro ne’e kuaze hetan estragu hotu, entaun fó impaktu maka’as no tuir relatóriu BTL katak sei lori tempu fulan rua ka tolu atu rekupera ida-ne’e, entaun komunidade iha área hanesan Bairro Pité, Manleu sorin balun, no Palapasu ne’e seidauk bele asesu bee-moos. Maibé BTL solusiona lori bee hodi fornese ba komunidade sira,” nia hatutan.

Maski nune’e, ekipa EDTL no BTL kontinua serbisu iha terrenu normaliza liña distribuisaun enérjia eletrisidade no kanu distribuisaun bee-moos ba komunidade iha área afetadu ne’ebé hetan estragu hosi inundasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here