Reitór UNTL, Joao Soares Martins. Imajen Tatoli/Egas Cristovão.

DILI, 17 abríl 2021 (TATOLI)–Reitór Universidade nasional Timor Lorosa’e (UNTL), João Soares Martins informa, sábadu ne’e, parte UNTL realiza teste swab ba estudante sira-ne’ebé iha nesesidade hakarak fila ba sira ida-idak ninia Munisípiu, ne’ebé hala’o iha varanda Fakuldade Ekonomia no Jestaun iha Kampus UNTL, hodi kumpre protokalu Sentru Integradu Jestaun Krize (SIJK) no Ministériu Saúde nian.

“Ita prontu fasilita alin estudante sira-ne’ebé mak iha nesesidade hakarak fila ba munisípiu. Ita prepara ona espasu iha varanda oin fakuldade Ekonómia no jestaun nian para Ministériu Saúde bele halo teste swab ba alin estudante sira molok atu fila ba sira-nia Munisípiu,” João Soares Martins hateten ba jornalista sira iha Kampus UNTL, Dili.

Teste swab ne’e obrigatóriu bá estudante sira tuir orientasaun Governu nian no estudante sira-ne’ebé iha nesesidade hakarak fila ba Munisípiu, para prevene moras ne’e labele hada’et ba komunidade no familia sira iha munisípiu.

Teste swab ne’e sei hala’o tuir kada fakuldade no hahú uluk hosi Fakuldade Siénsia Exata (FSE) no Fakuldade Engeñária, Siénsia no Teknolojia (FEST) iha sábadu (17/04) ne’e, depois mak Fakuldade Direitu no Fakuldade Filozofia iha domingu (18/04), hafoin kontinua ba Fakuldade Agrikultura iha segunda (19/04) semana oin.

Hafoin ne’e, sei kontinua halo teste swab ba estudante sira hosi Fakuldade Ekonomia no Jestaun (FEJ) iha tersa (20/04), Fakuldade Medisína, Siénsia no Saúde (FMSS) hala’o iha kuarta-kinta (21-22/04), Fakuldade Edukasaun, Arte no Umanidade (FEAU) iha sesta-sábadu (23-24/04) no ikus liu mak Fakuldade Siénsia Sosiál (FSS) ne’ebé sei hala’o iha domingu (25/04).

Reitór ne’e hateten, estudante sira-ne’ebé mak depois ninia rezultadu teste swab negativu maibé atu fila ba munisípiu mak laiha transporte, Governu sei asegura transporte hodi transporta estudante sira-ne’e ba ida-idak ninia munisípiu.

Maibé, nia husu ba estudante sira durante ba iha munisípiu tenke kumpre nafatin regra protokalu no medisa prevensaun sira-ne’ebé mak fó sai ona hosi Minsitériu Saúde no estudante UNTL sira atu nafatin koopera ho autoridade munisípais hodi kontinua asegura kondisaun no situasaun iha munisípiu.

“Bainhita ita-boot sira atu fila fali mai Dili tenke hein karta sirkulár desizaun ka autorizasaun husi MESSK mak foin bele fila mai Dili. Se laiha autorizasaun, ha’u husu estudante sira atu kontinua hakmatek iha munisípiu,” nia apela.

Estudante UNTL hosi Fakuldade Siénsia Exata (FSE) no Fakuldade Engeñária, Siénsia no Teknolojia (FEST) ne’ebé, ohin (sábadu, 17/04), simu tesete swab ne’e provizoriumente hamutuk ama na’in-400.

Jornalista: Tomé Amado

Editór: Cancio Ximenes

HAKEREK NO HATÁN

Please enter your comment!
Please enter your name here