Edifísiu eskola EBF Casnafar, Manleuana-Dili, ne’ebé hetan estragus hosi inundasaun iha 04 abríl. Imajen/Facebook.

DILI, 17 abríl 2021 (TATOLI)–Ministru Edukasaun Juventue no Desportu (MEJD), Armindo Maia, husu ba diretór Ensinu Skundáriu Tékníku Vokasionál (ESTV) Hera lalais halo levantamentu dadus ba fasilidade eskola nian ne’ebé hetan estargu, atu nune’e ministériu edukasaun bele buka medida ruma atu prevee mós orsamentu ba item sira-ne’e.

“Ha’u husu ba parte eskola bele lalais aprezenta relatóriu mai ha’u kona-ba sasán ka fasilidade eskola nian ne’ebé hetan ona estagu, para ita bele haree ona atu tau mós iha orsamentu ruma,” Armindo Maia hateten ba Diretór ESTV Hera hafoin halo vizita ba eskola refere, sábadu ne’e.

Governante ne’e husu ba dirijente eskola ne’e aselera prosesu levantamentu dadus hodi haruka relatóriu ba ministeriu edukasaun para bele tau iha diskusaun para bele hetan solusaun ruma.

Iha fatin hanesan, Diretór ESTV Hera, Francisco Fernandes, relata fasilidade eskola nian ne’ebé hetan estragu mak hanesan komputadór haat (4), printer rua (2) no lap top ida (1) mak estragu, inklui surat-tahan HVS no kaderneta estudante sira-nian lakon hotu no balun dodok tanba bee no tahu-nurak mak hoban.

Diretór ne’e konfesa, kauza hosi inundasaun ne’ebé akontese iha domingu (04/04) liu-bá ne’e, sasán eskola nian la aproveita, tanba bee-mota sa’e tun makas hosi mota iha eskola kotuk entaun sobu tiha eskritóriu eskola nian no lori lakon dokumentu importante eskola nian.

“Ha’u husu ba Ministru no Vise-Ministru Edukasaun atu lalais apoiu ami intermus fasilidade eskola nian. Husu bele komunika mós ho Ministeriu Obra Públika atu tau netik eskavadór ruma iha mota ne’e parabele normaliza lalais situasaun iha mota laran, atu nune’e bele garante kondisaun ba komunidade inklui eskola ida-ne’e nia kondisaun mós,” nia husu.

Jornalista: Tomé Amado

Editór: Cancio Ximenes

HAKEREK NO HATÁN

Please enter your comment!
Please enter your name here