Família matebian Francisca Gama, akompaña hosi dook prosesu haloot mate-isin, tersa (06/04). Imajen Tatoli/Joanico de Araújo.

DILI, 16 abríl 2021 (TATOLI)—Sala Situasaun Sentru Integradu Jestaun Krize (SIJK), konkorda atu liu tinan lima, família bele kee mate-ruin hosi matebian Francisca Gama, hodi ba haloot tuir kultura Laga, Munisípiu Baucau.

“Tinan lima mak família bele mai kee mate-ruin, hodi ba haloot tuir kultura iha nia moris fatin. Ida-ne’e mak ami-nia planu no ko’alia ona ho SIJK, sira aseita. Ami agradese ba Governu tanba esperiénsia foun ne’ebé sira enfrenta, maibé sira prontu serbisu nafatin hodi slava ema barak-nia moris,” Família matebian, Francisco Ximenes hateten ba jornalista-sira, hafoin hasoru-malu ho parte SIJK, iha CCD, sesta ne’e.

Notísia relevante:Mate-isin pasiente COVID-19 haloot ona, liu loron-10 família bele vizita

Durante enkontru ho SIJK, família matebian hato’o pozisaun katak, família hakruuk  ba desizaun Governu tuir regra Organizasaun Mundiál Saúde (OMS) ho Minsitériu Saúde (MS), kona-bá haloot mate-isin Francisca Gama, maski iha momentu ne’ebá mosu lamentasaun kiik ida katak, hakoi la ho dignu.

“Maibé, ami ho fuan boot, hakruuk no konsegue hakoi iha situasaun ne’ebá,” Francisco Ximenes hateten.

Nia rekoñese katak, iha momentu ne’ebá, lamentasaun lubuk-ida hanesan família la’ós protesta Governu, maibé sentimentu ema-nian tenki ko’alia-sai.

Sentimentu hirak-ne’e espresadu tanba, primeiru, tuir loloos SIJK hameno netik atu família tau roupa ka  tais-ruma molok tau mate-isin ba kaixaun, maibé la akontese.

Segundu, momentu ne’ebá Governu prepara ona kaixaun ba matebian, maibé la prepara mós kruz hanesan símbolu ida katak, Francisca Gama hakoi duni iha fatin ne’eba, ida ne’e mós la akontese.

Terseiru, Governu la dehan ba família atu prepara  netik lilin no ai-funan, tanba tuir kultura Baucau-nian, bainhira atu hakoi tenki iha última omenájen hosi oan, la’en no família, maibé ida-ne’e mós la akontese.

Kuartu, fatin ne’e mós ai-bubur laran, foin primeira vez hakoi Francisca Gama, maibé akontese tuir­-mai hanesan matebian Armindo Borges haloot fali iha semitériu.

”Tanba ne’e ami família sujere ba Govenru, se bele halo lutu hodi proteje tiha rate, nune’e animál labele sama. Entaun, SIJK simu ona sujestaun ne’e atu harii kruz no ami atu ba tau lilin ho ai-funan iha 20 abríl tinan ne’e,” Família matebian esplika.

Família mós sujere ba Governu atu bainhira hakoi ema mate tanba COVID-19, presija halo tratamentu ho dignu tanba Timór iha kultura no relijiaun.

Iha fatin hanesan, Koordenadór Forsa Tarefa Prevensaun Mitigasaun Surtu COVID-19 iha Timor-Leste (TL), Rui Maria de Araújo, husu deskulpa ba família matebian Francisca Gama, ne’ebé hakoi la dignu.

”Ami husu deskulpa ba família matebian no ami kompreende família sira-nia lamentasaun. Ohin hateten atu selebra ai-funan midar no tau kruz, depois ami halo hamutuk. Sujestaun-sira ne’ebé  fó kona-bá aspetu kultura-nian hanesan tau tais no roupa, ne’e kontempla hotu ona iha prosedimentu ne’ebé atu hala’o,” Rui Araújo husu deskulpa.

Parte SIJK mós iha esperansa katak, sei laiha tan óbitu, no SIJK esforsu maka’as atu labele iha tan, maibé bainhira iha karik, SIJK sei la repete tan  lakuna no falta-sira ne’ebé halo ona, hosi aspetu kultura-nian atu nune’e hanesan povu no nasaun respeita nafatin kultura.

“Tanba família matebian sujere ba oin mosu tan situasaun hanesan ne’e, tenki halo tratamentu hanesan no ami rekoñese erru ida-ne’e, ba oin la repete tan,” nia promete.

Entretantu, Francisca Gama (44) nu’udár timor-oan dahuluk ne’ebé hakotu iis iha tersa (06/04) dadeer, iha sala izolamentu antiga Ospitál Lahane ho COVID-19, hakoi iha semitériu ne’ebé lokaliza iha postu administrativu Metinaro, munisípiu Dili.

Jornalista: Felicidade Ximnes

Editór: Cipriano Colo

HAKEREK NO HATÁN

Please enter your comment!
Please enter your name here