Ekipa Saneamentu Dili kontinua rekolla lixu iha dalan públiku sira. Imajen TATOLI/Joanico de Araújo.

DILI, 16 abril 2021 (TATOLI)—Governu liuhosi Ministériu Administrasaun Estatál kontratu direta empreza PAX ho montante $300 mil hodi aumenta kamioneta 20 atu reforsa tan kapasidade Munisípiu Dili nian atu tula lixu tanba hafoin dezastre naturál ne’e volume lixu aumenta.

Administradór Postu Administrativu Cristo Rei Munisípiu Dili, Gaspar da Silva, informa hosi kamioneta 20 ne’e Ministériu Administrasaun Estatál fó apoiu kamioneta hitu (7) hosi empreza PAX ba Postu Administrativu Cristo Rei hodi fasilita rekolla no tula lixu.

“Ami Postu Administrativu Cristo Rei simu ona kamioneta hitu (7) hosi empreza PAX iha semana kotuk hodi ajuda tula lixu ba ba soe iha lixeiru Tibar, tanba kauza hosi inundasaun ne’e halo volume lixu aumenta,” Gaspar da Silva hateten ba Agência TATOLI iha nia knaar fatin, Postu Administrativu Cristo Rei, Becora Dili, sesta ne’e.

Kamioneta hitu ne’e, nia dehan, koloka tuir suku no bainhira tula lixu karik ba direta aldeia no suku tanba iha fatin sira-ne’e mak lixu barak, tanba karreta Saneamentu Munisípiu Dili nian ne’e halo servisu ka rekolla lixu iha estrada públiku de’it.

“Karreta saneamentu nian rekolla lixu foer iha dalan protokolu de’it. Bainhira lixu barak iha suku laran, ami bolu mak foin ba foti. Maibé mosu inundasaun ne’e, kamioneta sira-ne’e ba direta iha aldeia no suku hodi rekolla lixu no karreta saneamentu nian kontinua apoiu no rekolla lixu iha dalan públiku,” nia dehan.

Agora daudaun lixu barak liu ne’ebé naklekar iha área afetadu dezastre naturál mak tahu-maran no ai-hun no ai-sanak sira-ne’ebé bee-mota lori no lalin hodi afeta mós ba komunidade sira-nia uma no dalan públiku sira.

Ho volume lixu ne’ebé aumenta mak kamioneta sira-ne’ebé tula lixu hodi ba fakar iha lixeiru tibar ne’e, kada loron ida kamioneta sira-ne’e tula lixu kamioneta 21 no kada kamioneta ida tula dala tolu (3).

Postu Administrativu Cristo Rei iha suku ualu no aldeia 51 ho nia xefe família hamutuk 14.866 no populasaun hamutuk 74.272. Hosi totál populasaun 74.272 ne’e, feto hamutuk 36.727 no mane 37.545.

Notísia Relevante: MAE koloka tan karreta 20 tula lixu

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here