Ministru Finansa, Rui Augusto Gomes no Koordenadór Rezidente ADB, Sunil Mitra, asina akordu finansia programa rekuperasaun impaktu dezastre naturál, iha salaun MF, Aitarak-laran, sesta (16/04). Imajen/MF

DILI, 16 abríl 2021 (TATOLI)Ministériu Finansa (MF) selebra akordu ho Banku Dezenvolvimentu Aziátiku (ADB, sigla inglés) hodi apoia orsamentu millaun $1 mai Timor-Leste hodi finansia programa resposta ba inundasaun no rekuperasaun kauza hosi siklon tropikál seroja, ne’ebé hamosu inundasaun no rai-halai iha munisípiu balun inklui Dili.

Akordu ne’e asina hosi Ministru Finansa, Rui Augusto Gomes no Koordenadór Rezidente ADB, Sunil Mitra, ne’ebé realiza iha salaun MF, Aitarak-laran, sesta ne’e.

Biban ne’e, Ministru Finansa hateten subvensaun ne’e sei apoiu Governu Timor-Leste nia esforsu atu hadi’a serbisu salva moris hanesan halo avaliasaun ba estragu, koordena serbisu responde ba krize, rekuperasaun dezastre, fornese ajudu sira ba komunidade no reabilita infraestrutura bázika komunidade.

“Programa ne’e hodi finansia hamoos foer-sira, drenajen nesesária no hamoos dalan, inklui drenajen bee ne’ebé nalihun atu prevene moras dengue no reparasaun nesesária sira seluk ne’ebé urjente,” Ministru Rui Gomes relata liuhosi nota ne’ebé Agência TATOLI asesu, sesta ne’e.

Aleinde ne’e, sei halo avaliasaun estragu rápida ba uma sira ne’ebé afetadu no infraestrutura komunidade atu hatene di’ak liután konsekuénsia inundasaun ne’e.

“Programa ne’e mós sei fornese ho emerjénsia, hahan ne’ebé hola iha rai-laran ba pesoál no família sira ne’ebé mak labele serbisu, inklui maioria ita-nia agrikultór sira ne’ebé mak nia plantasaun, toos no natar hetan estragu hosi siklon tropikál seroja,” nia akresenta.

Apoio fundu ba dezastre naturál, ne’ebé tama ona iha Protesaun Sivíl mak hanesan Estadu Unidu Amérika (EUS) $100.000, Xina $100.000, Austrália millaun $5,34, Japaun liuhosi JICA apoia manta 5.000 no Banku ANZ kontribui $50.000.

Aleinde ne’e, iha mós ajuda nesesidade bázika hosi parseiru internasionál no nasionál, ne’ebé tama hotu iha Protesaun Sivíl no destina ba vítima dezastre naturál.

Dadaun ne’e, Governu rejista ema hamutuk na’in-35 mak lakon vida durante dezastre naturál iha loron 04 abríl no na’in-10 seidauk hetan isin.

Hosi na’in-35, na’in-20 iha Dili, neen iha Ainaro, tolu iha Viqueque, rua iha Covalima, rua iha Manatuto, ida iha Aileu no na’in-ida iha Baucau.

Enkuantu ema na’in-10 maka lakon durante inundasaun, kompostu hosi na’in-haat iha Ainaro, haat iha Manatuto no rua iha Dili.

Família 25.000 resin maka hetan impaktu hosi dezastre naturál no hela fatin 4.546 maka a’at.

Nune’e mós, iha nível infraestrutura públika sira, iha estrada hamutuk 22 no ponte 11 mak hetan estragu maka’as no presiza atua urjente.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here