Manajér kompañia (BTK) Group, Evaristo Soares Guterres da Silva, oferese sasán nesesidade bázika ba Sekretáriu Estadu Protesaun Sivíl, Joaquim Gusmão, iha edifísiu SEPS, Caicoli, sesta (16/04/21). Imajen Tatoli/Egas Cristóvão.

DILI, 16 abríl 2021 (TATOLI)—Kompañia Bakti Timor Karya (BTK) Group, oferese nesesidade bázika ba vítima dezastre naturál, liu hosi Sekretária Estadu Protesaun Sivíl (SEPS).

Sasán nesesidade bázika hosi kompañia (BTK) Group mak hanesan, foos saka 250, ho super mie, mina bimoli, biskuite, ikan-lata sardiña no lipa.

Notísia relevante:Arkedioseze Díli Apoia Família 7.000-Resin Durante Situasaun COVID-19

Manajér kompañia (BTK) Group, Evaristo Soares Guterres da Silva oferese sasán hirak-ne’e ba Sekretáriu Estadu Protesaun Sivíl, Joaquim Gusmão, iha edifísiu SEPS, Caicoli, Dili, sesta ne’e.

Evaristo Soares Guterres da Silva, hateten apoiu ne’ebé kompañia fó, hanesan solidariedade ba vítima dezastre naturál, atu bele rekopera hikas hosi situasaun ne’e.

“Ho kbi’it natón ami oferese apoiu hirak-nee atu tulun ita-nia maluk-sira iha situasaun ne’e,” Evaristo Soares Guterres da Silva, subliña.

Nune’e mós SEPS, Joaquim Gusmão, agradese tanba kompañia-sira sempre lolo-liman, liu-liu kompañia BTK, hodi tulun Timoroan-sira iha tempu susar.

“Ita agradese tanba bele ajuda parte protesaun sivíl, hodi distribui fila-fali ba komunidade afetadu ba inundasaun,’’ Joaquim Gusmão hateten.

Antes ne’e kompañia (BTK) Group oferese ona apoiu hanesan foos ba Arkedioseze Dili, hodi bele fó atendimentu ba maluk-sira iha sentru evakuasaun-sira.

Oras ne’e daudaun, kompañia (BTK) Group mobiliza mós ninia ekipamentu pezadu halo normalizasaun ba mota no raut fo’er iha área Bidau Santana ho mota Comoro.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here