Kondisaun estrada Beduku hafoin inundasaun iha domingu (04/04). Imajen TATOLI/António Gonçalves.

DILI, 16 abríl 2021 (TATOLI)—Inundasaun ne’ebé akontese iha domingu (04/04) afeta kuaze iha munisípiu hotu iha territóriu, tanba ne’e daudaun Governu liuhosi Institutu Jestaun no Ekipamentu (IGE, sigla portugés) hamutuk ho kompañia iha área infraestrutura halo normalizasaun.

“Ekipa IGE no setór privadu balun esforsu halo normalizasaun hasai sedimentasaun no limpeza iha kapitál Dili inklui munísipiu sira. Daudaun ne’e, kompañia 20-resin ajuda halo atividade iha fatin 29 ne’ebé IGE atende hela,” Ministru Obra Públika, Salvador Eugênio Soares dos Reis Pires, informa liuhosi nota ne’ebé Agência TATOLI asesu, sesta ne’e.

Ministru Salvador hamutuk ho Vise Primeiru-Ministru no Ministru Planu no Ordenamentu, José Maria dos Reis, partisipa iha audiénsia públika ho Komisaun C (Finansa Públika) iha Parlamentu Nasionál hodi hato’o informasaun jerál relasiona ho infraestrutura.

Nune’e, relata katak área ne’ebé konsege normaliza maka mota Maloa, estrada Bekusi, Armazen Servisu Autónomu Medikamentu no Ekipamentu Saúde (SAMES), Palásiu Prezidensiál, hasai ai iha ponte Becora mota ulun, hasai fatuk iha estrada Tibar, hasai fatuk no ai iha mota ponte Bekusi, normaliza mota Bidau Masaur, hasai sedimentasaun iha mota Metiaut Hotel SK nian, hasai rai monu taka estrada iha Área Branka, hasai tahu iha estrada Manleuanna, normaliza mota Maloa aldeia Mate-Restu, hasai fatuk no rai taka estrada iha Metiaut, aterru estrada iha Golgota aldeia 4 de Setembru.

Nune’e mós, normaliza mota Manleuana no mós hasai tahu no rai-henek ne’ebé taka estrada, Bidau Santana, normaliza mota iha Bedois, normaliza mota iha Hera hodi salva torre eletrisidade, hasai tahu iha estrada Farol, hasai sedimentasaun iha suku Maskarinhas, hasai rai iha estrada Taibesi, aterru estrada Marabia, inklui aterru estrada iha uma defisiénsia nian.

“Aleinde ne’e, iha parte munisípiu, halo ona atendimentu kuaze ba estrada kotu iha Laklubar, Remexio no mós Lekidoe ne’ebé ami halo hela esforsu atu fahe ami-nia rekursu atu halo atendimentu ho kooperasaun setór privadu sira-nian,” Ministru akresenta.

Governante ne’e agradese ba apoiu kompañia atua área afetatadu inundasaun.

“Hakarak agradese setór no grupu voluntáriu sira ne’ebé mak iha loron dahuluk kedas hamutuk ho Governu halo intervensaun no asaun koletiva normaliza ita-nia situasaun kalamidade. Klaru katak ita-nia prioridade mak kontinua halo limpeza, hasai sedimentasaun, no halo normalizasaun para ita-nia atividade sira kontinua la’o hanesan baibain,” nia hatutan.

Estimasaun kustu rekuperasaun infraestrutura millaun $225

Grupu tékniku Diresaun Jerál Obra Públiku hosi Ministériu Obra Públiku (MOP) no Ajénsia Dezenvolvimentu Nasionál (ADN) verifika ona estragu infraestrutura dizastre naturál iha domingu (04/04)  no halo ona estimasaun ba kustu.

“Iha dadus prelimináriu ne’ebé identifika hosi ekipa no sei presiza halo identifikasaun, kustu rekuperasaun hamutuk millaun $225,” Ministru Salvador informa.

Ekipa estabelesidu atu halo identifikasaun, kuantifikasaun no kualifikasaun ba estragu sira no halo mós planu mitigasaun atubele rehabilita fali infraestrutura ne’ebé a’at.

Ekipa estabelesidu bazeia ba despaixu hosi Primeiru Ministru, Taur Matan Ruak, kompostu hosi ekipa umanitária lidera hosi Ministru Administrasaun Estatál, Miguel Pereira de Carvalho, servisu hamutuk ho Sekretáriu Estadu Protesaun Sivíl, Joaquim Gusmão, enkuatu ekipa infraestrutura lidera hosi Vise Primeiru-Ministru no Ministru Planu no Ordenamentu no Ministériu Obra Públika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here