IGE apoiu servisu emerjénsia loke dalan foun no hadi’a dalan ne’ebé kotu tanba dezastre naturál, iha suku Horlalan, postu administrativu Laclubar, munisípiu Manatuto. Imajen/IGE

DILI, 16  abríl 2021 (TATOLI)–Prezidente  Institutu  Jestaun Ekipamentu (IGE, sigla portugés), Ermenegilda da Costa Laurentina, hateten daudaun ne’e institutu kontinua halo intervensaun normaliza fatin sira iha munisípiu hetan impaktu maka’as inundasaun ne’ebé akontese iha domingu (04/04).

“Hafoin inundasaun, Laclo mós dalan kotu totál no rai monu. IGE kontinua normaliza fikas hodi fasilita movimentasaun públiku,” Prezidente IGE informa ba Agência TATOLI, iha ninia knaar fatin, Colmera, sesta ne’e.

Iha munisípiu Lautém, IGE halo intervensaun iha Mota Odoforo, iha suku Daudere no fó apoiu ba komunidade halo limpeza.

Iha munisípiu Bobonaro, instututu normaliza área besik mota Marobo ne’ebé bee sa’e tanba udan boot.

“Ami aterru ona Ponte Bilimau no salva mós torre eletrisidade, kuandu  torre ne’e la proteje bele fó impaktu ba komunidade sira iha Bobonaro tanba ahi bele mate,” nia akresenta.

Nune’e mós, ekipa IGE halo intervensaun iha mota iha munisípiu Covalima no normaliza estrada no mota iha munisípiu Ermera no agora atu prepara halo intervensaun iha munisípiu seluk tan.

“Ami prepara atu apoiu iha munisípiu Aileu tanba dalan iha ne’ebá kotu totál no agora ekipa IGE iha Dili loke dalan hosi Marabia no sei loke dalan ida iha Dare, nune’e ita-nia komunidade sira bele asesu,” nia subliña.

Aleinde ne’e, institutu normaliza ona mota Sahen no mota Laclo iha munisípiu Manatuto, mota iha munisípiu Covalima inklui ponte no mota munisípiu Viqueque.

Enkuantu, iha Dili laran IGE sei normaliza fatin hamutuk 30 ne’ebé afetadu ba inundasaun, ne’ebé fatin 19 maka rezolve ona maibé restu sei kontinua normaliza.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here