Hafoin simu vasina AstraZeneca, funsionáriu Prezidénsia Repúblika hasai retratu hamutuk. Imajen/Mídia PR.

DILI, 16 abríl 2021 (TATOLI)—Funsionáriu Prezidénsia Repúblika, ohin, simu vasina AstraZeneca nu’udar parte ida hosi medida no kampãna prevensaun hasoru moras COVID-19 atu Corona Virus labele da’et hosi ema ida ba ema seluk.

Xefe Kaza Sivíl Prezidénsia Repúblika, Francisco Maria de Vasconcelos, hateten Prezidénsia Repúblika tama iha kategoria primeiru grupu ne’ebé hetan vasinasaun no hamutuk ho Prezidente Repúblika hamriik iha liña frente iha luta hasoru COVID-19.

Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR.

“Atu hatudu ba sidadaun katak vasina ne’e seguru no di’ak atu kombate moras ida-ne’e. Tanba ne’e ita koopera hamutuk ho doutór sira atu vasina bele la’o ho susesu, hanesan kampaña ida ba sidadaun tomak iha Timor-Leste. Vasina ne’e sei hala’o durante loron tolu iha Palásiu Prezdente,” Francisco Maria de Vasconcelos hateten liuhosi komunikadu imprensa ne’ebé Agência TATOLI asesu, sesta ne’e.

Desde fulan marsu tinan-2020, bainhira Timor-Leste rejista kazu pozitivu dahuluk, Prezidente Repúblika deklara Estadu Emerjénsia nu’udar medida prevensaun no kontrolu atu virus corona la hada’et hosi ema ida ba ema seluk, hodi hasees-aan hosi kalamidade públika.

Bazea ba estadu emerjénsia ne’ebé implementa desde fulan marsu tinan kotuk to’o ohin loron, Governu foti medida rigorozu ba prevensaun COVID-19 hanesan implementasaun serka sanitária no konfinamentu obrigatóriu ba fatin sira-ne’ebé iha ona kontajen lokál.

Tanba ne’e, iha 7 abril 2021, Governu halo ona lansamentu ba vasina AstraZeneca hodi hametin liután medida prevensaun no kontrolu COVID-19 nian. Liuhusi inisiativa COVAX, Timor-Leste hetan ona vasina AstraZeneca hamutuk 24.000.

Distribuisaun vasina ne’e hala’o ona ba munisípiu 12 inklui Rejiaun Administrativa Espesiál Oé-Cusse Ambeno (RAEOA) hodi fó prioridade ba liña frente sira atu simu vasina ne’e. Governu nia meta mak iha tinan-2021 nia rohan, sidadaun hotu-hotu iha Timor-Leste sei hetan vasina AstraZeneca.

Governu liuhosi Xefe Governu halo ona akordu ho Primeiru-Ministru Australia atu kada semana tolu sei haruka vasina hamutuk 10.000 mai Timor-Leste. Sidadaun Timor-Leste bele hetan nia herb-immunity bainhira 80% populasaun hetan ona vasina.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here