Funsionáriu sira forma atu simu vasina, iha Aeroportu Internasionál Prezidente Nicolau Lobato, Comora, Dili, sesta (16/04). Imajen TATOLI/Natalino Costa

DILI, 16 abríl 2021 (TATOLI)–Funsionáriu Administrasaun Aeroportu Navegasaun Aérea Timor-Leste, Empreza Públika (ANATL, E.P) hamutuk ho parseiru ne’ebé serbisu iha aeroportu simu ona vasina AstraZeneca.

Prezidente ANATL, José Trindade, hateten funsionáriu iha aeroportu koñesidu hanesan liña frente tanba halo atendimentu ba movimemtu ema no sasán tama-sai.

“Ministériu Saúde no Organizasaun Mundiál Saúde konsidera katak ema sira ne’ebé servisu iha aeroportu risku a’as ba COVID-19. Ohin ami hetan oportunidade vasina, tanba ne’e ha’u hanesan Presidente hamrik iha oin atu simu vasina dahuluk hodi hatudu ezemplu ba ha’u-nia funsionáriu sira hotu para mai tuir vasina,” Prezidente ANATL dehan iha Aeroportu Comoro, Dili, sesta ne’e.

Enkuantu, funsionáriu ANATL hamutuk na’in-177 maibé balun de’it mak tuir inklui parseiru destakadu iha aeroportu hanesan Polísia Unidade Patrullamentu Fronteira (UPF), Imigrasaun, Kuarentena, Alfándega no parseiru sira seluk.

“Prevee ba ema na’in-50 maibé ema mai barak ona. Ami lá obriga funsionáriu sira hotu para tenke mai maibé antes ne’e Ministeriu Saúde sosializa ona. Husu funsionáriu ANATL para ida-idak atu mai simu Vasina,” nia akresenta.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here