Populasaun Bairru Besi-Tua, okupa espasu iha foho leten Kapela São João Paulo II, domingu (04/04). Imajen Tatoli/Domingos Piedade Freitas.

DILI, 16 abríl 2021 (TATOLI)—Tuir dadus hosi Sekretária Estadu Protesaun Sivíl (SEPS), ho Ministéiru Administrasaun Estatál (MAE), oras ne’e daudaun, família uma-kain 1.000-resin  iha Munisípiu Dili mak kontinua hela iha sentru evakuasaun ativu hamutuk 38.

Sentru evakuasaun hirak-ne’e kompostu hosi edifísiu públiku hanesan eskola, no Igreja inklui edifísiu komunidade relijiozu-relijioza, ne’ebé antes ne’e iha akulumusaun sentru evakuasaun hamutuk 43, maibé família balun re-integra hikas ba sira-nia hela fatin.

Notísia relevante:SEPS distribui ona apoiu emerjénsia ba família 2.000 iha Dili

To’o loron 14 abríl, iha Dili ema 11.104 maka hela iha sentru evakuasaun ativu 38, hosi família hamutuk 8.548 ne’ebé afeta hosi inundasaun.

“Maibé dadus ikus, to’o loron 15 abríl númeru komesa redúz, hela família 1.000-resin mak kontinua hela iha fatin evakuasaun ativu 38,’’ SEPS, Joaquim José Gusmão dos Reis Martins, hateten ba jornalista Agência Tatoli, iha kna’ar fatin Caicoli, Dili, sesta ne’e.

SEPS kontinua halo evaluasaun kada loron ba fatin evakuasaun no ba família-sira ne’ebé identifika kondisaun uma komesa di’ak, halo aproximasaun ho sira hodi bele fila-fali ba sira-nia fatin.

Komunidade ne’ebé ho kondisaun uma a’at hotu, SEPS asegura atu kontinua hela iha fatin evakuasaun, hanesan iha Tasi-tolu no sira ne’ebé hela besik mota ninin, inklui foho lolon labele fila bá hela iha fatin sira ne’e, no hein Governu haree medida iha futuru.

“Governu iha hela prosesu identifikasaun ba oin atu deside saida mak sei halo, hodi responde ba família-sira,” nia subliña.

Entretantu, SEPS, distribui ona apoiu emerjénsia ba família hamutuk 2.000 iha Munisípiu Dili, ne’ebé afetadu ba dezastre naturál, iha 04 abríl tinan ne’e.

Apoiu emerjénsia ne’ebé SEPS fó ba família afetadu-sira mak hanesan foos, ikan-lata (sardina), mina bimoli, susu-ben, super mie, sasán kuziña ho seluk tan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here