Liña frente simu vasina AstraZeneca doze dahuluk, sesta (16/04). Imajen TATOLI/António Gonçalves

DILI, 16 abríl 2021 (TATOLI)—Sala Situasaun Sentru Integradu Jestaun Krize (SIJK), rejista kazu foun pozitivu COVID-19 na’in 55, kazu rekoperadu 60 no kazu ativu hamutuk 560.

“Kazu detetatu foun 55 mai hosi Dili 43, no Munisípiu seluk 12. Hosi totál kazu detetadu foun ohin iha mane 29, feto 26, sintomátiku na’in-ida, asintomátiku 54,” Koordenadór Forsa-Tarefa ba Prevensaun no Mitigasaun, Rui Maria de Araújo hato’o via zoom, sesta ne’e.

Notísia relevante:COVID-19: kazu foun 17, ativu 547

Hosi totál kazu detetadu foun ohin, 39 (70%) mak deteta tanba halo teste ho razaun atu halo viajen ka halo ona viajen ba Munisípiu hafoin deteta pozitivu.

Kazu foun 43 ne’ebé detetadu iha Munisípiu Dili, ohin kompleta kazu detetadu iha Munisípiu ne’e, sura kumulativamente hosi 2020, to’o 16 abríl 2021, hamutuk hotu 1.006.

Hahú ohin, sei la relata dadus tuir cluster, maibé sei temi de’it fatin ne’ebé kontinua deteta kazu foun iha Munisípiu Dili-nia laran.

Hosi horisehik mai ohin, fatin sira ne’ebé deteta kazu foun mak hanesan Comoro 12, Santa Cruz sia,  CCD neen, Fatuhada neen, Caicoli, Becora, Laboratoriu Nasional Saúde rua, Vila-verde, Mascarenhas, Madohi  ida, nune’e iha Munisípiu Dili, hamutuk hotu, sei nafatin iha cluster 23.

Iha Munisípiu Aileu, hosi horisehik mai ohin, deteta tan kazu foun ida no iha Munisípiu Manufahi, hosi horisehik mai ohin, deteta tan kazu foun 11.

Hosi Munisíspiu seluk no Rejiaun Administrativu Espesiál Oe-cusse Ambeno (RAEOA), la deteta kazu foun.

Hosi horisehik mai ohin, hamutuk hotu Laboratóriu Nasionál Saúde (LABNAS) halo testes PCR 1.139, ho detalla hanesan tuir mai, Vijilánsia sentinela 234, Rastreiu ba kontaktu ka Contact tracing 142, Rastreiu Aleatoriu ka Random Screening 159, Viajen sai hosi serka sanitária Munisipiu Dili 730, Viajen internasionál  20,  Follow up iha quarentena 34. Totál kazu konfirmadu kumulativu sura hosi 2020, 1.193.

Totál pedidu autorizasaun esesionál atu sai hosi serka sanitária iha Munisípiu Dili, iha 14 no 15 abríl, hamutuk hotu 325. Sekretariadu SIJK responde hotu kedan, maibé pedidu 15 la prienxe kritériu tuir Rezolusaun Governu kona-bá Serka Sanitária iha Munisípiu Dili.

Iha kazu detetadu sintomátiku lijeiru balun, oras ne’e iha fatin izolamentu, mak keixa hanesan parte hosi síntoma, susar ka labele atu horon morin ka dois.

“Ida ne’e parte hosi síntoma COVID-19. Favór labele pániku, tanba maioria ema ne’ebé hetan síntoma hanesan ne’e, sei rekopera fali ninia kapasidade atu horon sasan,” Rui Maria de Araújo apela.

Iha izolamentu Vera Cruz iha kazu pozitivu na’in-hitu, ida grave, na’in-neen moderadu. Hosi kazu pozitivu na’in-hitu ne’e, tolu iha área medisina interna, haat seluk iha obstetrisia.

Kazu grave ne’ebé iha Vera Cruz, nafatin uza ventiladór no ai-moruk balun tuir protokolu ne’ebé Timor-Leste adopta, maibé iha estadu krítiku, isin sei manas nafatin no dada-iis ho asisténsia mákina.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here