ADTL entrega xave uma nian ba maluk defisiente ida ne'ebé foin lalais nia uma hetan estraga totál hosi inundasaun. Imajen Tatoli/Arminda Fonseca

DILI, 16 abríl 2021 (TATOLI)-Asosiasaun Defisiénsia Timor-Leste (ADTL), sesta ne’e, fó apoiu nesesidade báziku ba defisiente na’in-35 iha Bairru Malinamuc, Aldeia 04 Setembru, Suku Comoro, Postu Administrativu Don Aleixo, Munisípiu Dili, ne’ebé sai vítima ba dezastre naturál, 04 abríl, foin lalais ne’e.

“Ami identifika katak iha Malinamuc ne’e, ita-nia maluk defisiente 35 maka afetadu hosi inundasaun,  nune’e ami fó apoiu uitoan oinsá sira aguenta moris iha situasaun difisil ka kalamidade ida-ne’e,” diretór ezekutivu ADTL, Cesário da Silva hateten ba jornalista sira iha Malinamuc, Comoro, Dili.

ADL fó apoiu nesesidade báziku ba defisiente na’in-35 iha Bairru Malinamuc, Aldeia 04 Setembru, Suku Comoro, Postu Administrativu Don Aleixo, Munisípiu Dili. Imajen Tatoli/Arminda Fonseca

Apoiu nesesidade báziku ne’ebé, ADTL oferese  ba defisiente hirak -ne’e, mai hosi doadór hanesan Ministériu Solidariedade Sosiál no Inkluzaun (MSSI) ho UNICEF.

Sasán-sira ne’ebé distribui ba defisiente 35 ne’e mak hanesan, foos, supermi, no sasán ijiene sira hanesan balde, sabaun, ai-saar, no sabaun rinso.

Iha biban ne’e mós, ADTL entrega xave uma nian ba maluk defisiente ida ne’ebé foin lalais nia uma hetan estraga totál hosi inundasaun ne’ebé akontese ne’e.

“ADTL entrega xave uma nian ba família defisiente ida ne’ebé foin lalais nia uma hetan estraga totál hosi inundasaun ne’e, tanba ami mai observa, ami hadi’a fali uma ne’e atu sira hela fali,” Cesário da Silva informa.

Defisiente Agustinho Soares, ne’ebé sai vítima ba dezastre naturál ne’e, hato’o agradese ba ADTL no Kongregasaun Filhas de Maria Auxiliadora, Comoro Dili, ne’ebé ajuda ona nia ho nia família evakua ba Sentru evakuasaun FMA Comoro, Dili.

Jornalista   : Arminda Fonseca

Editór         : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here