MAE hamutuk ho Vise Primeiru-Ministru no Ministru Planu no Ordenamentu José Maria dos Reis halo vizita ofisiál no distribui nesesidade bázika ba vítima dezastre naturál iha sentru evakuasaun Grupu II João Paulo II Tasi-Tolu, Dili. Imajen/Mídia MAE.

DILI, 16 abril 2021 (TATOLI)—Administradór Postu Administrativu Cristo Rei, Gaspar da Silva, husu Governu atu halo ekipa konjunta ida ho autoridade komunitária sira hodi hafoin distribui apoiu umanitáriu ba família afetadu dezastre naturál para iha balansu ba distribuisaun.

“Ha’u husu atu Governu ho autoridade komunitária halo ekipa konjunta ida hodi distribui ai-han ba vítima dezastre naturál sira iha terrenu para iha balansu ba distribuisaun. Ho ida-ne’e mak iha futuru labele mosu buat ne’ebé ladi’ak ba ita,” Gaspar da Silva hateten ba jornalista TATOLI, iha nia knaar fatin Postu Administrativu Cristo Rei, Becora Dili, sesta ne’e.

Administradór ne’e hateten, Governu liuhosi ministériu relevante ne’ebé mak distribui apoiu umanitáriu hodi fahe sasán neseidade bázika ba vítima sira tenke halo koordenasaun di’ak ho autoriedade munisipál no autoridade komunitáriu sira. Tanba, bainhira distribui iha suku ida tenke liuhosi postu administrativu para autoridade sira hatene família ida-ne’ebé mak seidauk simu no ida-ne’ebé mak hetan ona apoiu.

“Bainhira kontribuitór ida mak la liuhosi ami mak ema ne’ebé hetan ona kontinua hetan no ida seidauk hetan kontinua la hetan. Ikus saida mak akontese. Mai ami líder komunitáriu, populasaun ida-idak mai dehan Governu la tau matan. Tanba ida-ne’e mak ha’u husu presiza iha ekipa konjunta ida ba asuntu ida-ne’e,” nia dehan.

SApoiu hotu-hotu ne’ebé karik Governu atu oferese ba populasaun afetadu sira, tuir nia, tenke liuhosi odamatan ida-de’it, nune’e populasaun hotu-hotu bele hetan tanba populasaun iha kapitál Dili kuaze enfrenta dezastre naturál ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here