Líder karismátiku, Kay Rala Xanana Gusmão, mobiliza ekipa bombeiru hodi rega rai-rahun iha arreadór sentru izolamentu Vera Cruz, kinta (15/04/21). Imajen Tatoli/Egas Cristóvão.

DILI, 15 abríl 2021 (TATOLI)—Líder karismátiku, Kay Rala Xanana Gusmão, mobiliza ekipa bombeiru  hodi rega rai-rahun iha arreadór sentru izolamentu Vera Cruz.

Tuir observasaun Agência Tatoli iha terrenu katak, área sala izolamentu rai-rahun makaas, kauza hosi inundasaun iha 04 abríl.

Notísia relevante:Xanana Gusmão kontinua toba iha sentru izolamentu Vera Cruz

Tanba ne’e, líder nasionál ne’e organiza bombeiru hodi rega, nune’e labele prezudika saúde pasiente COVID-19 ne’ebé baixa iha sala izolamentu, inklui família matebian Armindo Borges, ne’ebé halibur-malu loron tolu ona iha fatin ne’e.

Antes rega rai-rahun, Xanana Gusmão fahe uluk hahán matabixu dadeer-nian ba membru Polísia Nasionál Timor-Leste (PNTL), ne’ebé hala’o seguransa iha izolamentu Vera Cruz.

Ohin, tama ona ba loron haat, Kay Rala Xanana Gusmão hamutuk ho família matebian Armindo Borges ne’ebé mate ho COVID-19, hodi kontinua hein desizaun Governu ba destinu mate-isin, tanba família hakarak haloot tuir kultura Timór-nian.

Hafoin reuniaun KM iha 14 abríl, Ministru Prezidénsia Konsellu Ministru, Fidelis Manuel Leite Magalhães, hateten, situasaun ne’ebé akontese iha Vera Cruz hanesan asuntu tékniku, ne’ebé entidade-sira hetan delegasaun kompeténsia hosi membru Governu, liuliu Primeiru Ministru (PM), Taur Matan Ruak hanesan Komandante Operasionál iha Sala Situasaun Sentru Integradu Jestaun Krize (SIJK) mak bele pronúnsia.

Tuir observasaun, situasaun atuál iha sentru izolamentu Vera Cruz kontinua kontroladu  tanba hetan seguransa másima hosi PNTL.

Jornnlista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here