Membru Polísia Nasionál Timor-Leste (PNTL), asegura prosesu hasai mate-isin Armindo Borges iha sentru izolamentu Vera Cruz, kinta (15/04/21). Imajen Tatoli/António Gonçalves.

DILI, 15 abríl 2021 (TATOLI)—Líder nasionál, Kay Rala Xanana Gusmão, agradese ba membru Polísia Nasionál Timor-Leste (PNTL), ne’ebé konsege serbisu makaas no di’ak hodi asegura mate-isin Armindo Borges (AB), hahú hosi sentru izolamentu Vera Cruz to’o prosesu funerál.

“Ha’u agradese ba polísia-sira, imi hotu-hotu nia komportamentu no seguransa ne’ebé di’ak, buat hotu la’o di’ak,” Xanana hateten iha semitériu Manleuana, kinta ne’e.

Notísia relevante:Xanana no família matebian Armindo Borges sei halo teste swab

Xanana mós husu ba família matebian, fila ba uma hodi prepara an atu koopera ho ekipa Ministériu Saúde (MS) atu halo teste swab, nune’e evita transmisaun surtu COVID-19.

Líder karismátiku ne’e apela mós ba joven rihun-resin ne’ebé partisipa iha serimónia funerál ne’e, atu fila ba ida-idak nia uma, kumpre nafatin protokolu saúde, no evita kria konflitu.

“Matebian hakoi ona, ita ida-idak fila ba uma ho hakmatek no kumpre nafatin regra saúde-nian,” Xanana apela.

Serimónia funerál ba matebian Armindo Borges (47) hala’o iha tuku 16:00, iha semitériu Kamalhout, Aldeia Badiak, Suku Manleuana, Postu Administrativu Dom Aleixo, Munisípiu Dili. 

Serimónia funerál ne’e partisipa hosi ema rihun-resin, no hetan seguransa másima hosi PNTL, kompostu hosi Unidade Espesiál Polísia (UPE), Batalliaun Orden Públiku (BOP), Unidade Taskforce Dili, Unidade Polísia Marítima (UPM), Korpu Seguransa Pesoál (CSP), Serbisu Informasaun Polísia (SIP), Polísia Tránzitu Munisípiu Dili, hamutuk 300-resin, inklui membru F-FDTL asegura iha estrada públiku no rezidénsia matebian iha Comoro, Dili.

Durante sai hosi sentru izolamentu Vera Cruz, mate-isin Armindo Borges hetan akompañamentu hosi família no ema barak hamriik iha estrada públiku, hodi fó mós sentidu péssame ba família.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here